Украина президенти Владимир Зеленский 9 июнь куни кечқурун франциялик ҳамкасби Эммануэль Макрон билан телефон орқали мулоқот қилди. Макрон Киевга қурол-яроғ, жумладан, оғир қуроллар етказиб бериш ҳажмини оширишга тайёрлигини маълум қилди. Бу ҳақда Елисей саройи матбуот хизмати хабар берди.
«Europe 1» радиостанциясининг маълумотларига кўра, Франция июнь ойи охиригача Украинага яна олтита CAESAR русумли 155 миллиметрли ўзиюрар артиллерия мосламаларини топшириш ҳақида эълон қилиши мумкин. Украина армияси апрель ойида CAESAR’нинг дастлабки олтита қурилмасини олган эди.
Хабарга кўра, Макроннинг ўзи ҳам яқин ҳафталарда Киевга ташриф буюриши ҳамда сафар давомида янги таъминотлар ҳақида эълон қилиши мумкин.
Ғарб давлатлари Россиянинг 24 февралда бошлаган босқини фонида Украинага қурол етказиб бериш ҳажмини оширди. Франция Ташқи ишлар вазирлиги жанговар ҳаракатлар бир неча йил давом этишини истисно қилмаган. Эммануэль Макрон Владимир Путинга бир неча бор қўнғироқ қилган, улар жами 100 соат гаплашган. Суҳбатлардан бирида Россия президенти Украинага қурол етказиб беришни тўхтатишга чақирган.
Изоҳ (0)