Ukraina Isroildan “Temir gumbaz” raketaga qarshi mudofaa tizimini sotib olmoqchi. Bu haqda Ukrainaning Isroildagi elchisi Yevgeniy Korniychuk ma’lum qildi, deb yozmoqda The Jerusalem Post.
Korniychukning aytishicha, Ukrainadagi harbiy amaliyotlar mavzusi Isroil matbuotidan deyarli butunlay chiqib ketgan. Uning fikricha, bu hukumatning sodir bo‘layotgan voqealardan xavotirlari va Ukraina masalasini “ikkinchi planga qo‘yish” istagini aks ettiradi.
“Isroil hukumati o‘z komfort zonasidan chiqib, reallikka qaytishini istayman”, — dedi elchi. “Bizga Isroilning yordami, ya’ni harbiy texnik yordam kerak; bizga ‘Temir gumbaz’ zarur”.
Shu bilan birga, Korniychuk Kiyevga “ehson” kerak emasligini, aksincha u raketaga qarshi mudofaa tizimini sotib olmoqchi ekanini ta’kidladi.
Biroq Jerusalem Post manbalariga tayanib, Isroil AQSH bilan mudofaa mahsulotlari eksportini tartibga soluvchi kelishuvlar, shuningdek, bunday mahsulotlarning eksport nazorati sohasidagi xalqaro majburiyatlari tufayli “Temir gumbaz”ni Ukraina yoki boshqa davlatga sotishi dargumon, deb yozmoqda.
“Temir gumbaz” raketaga qarshi mudofaa tizimini Ukrainaga o‘tkazish masalasi 2021-yil sentabrida ham ko‘tarilgan edi. O‘shanda Politico manbasiga tayanib, amerikalik kongressmenlarning ba’zilari Kiyevga ikkita shunday tizimni yetkazib berishni taklif qilganini yozgan. Nashr suhbatdoshiga ko‘ra, bu “Ukrainaning Rossiyadan bo‘layotgan tahdidni zararsizlantirishga” yordam berishi kerak edi.
Rossiyaning Ukrainadagi bosqini boshlanganidan beri Isroil mamlakatga gumanitar yordam, shuningdek, o‘q o‘tkazmaydigan jilet va dubulg‘a kabi jihozlar yetkazib berdi. Biroq Korniychuk bu ta’minotda muammolar borligini aytgan. Uning so‘zlariga ko‘ra, Isroil Ukraina so‘raganidan ancha kam jilet va dubulg‘a jo‘natgan, shuningdek, mahsulotlar beshinchi emas, uchinchi toifada bo‘lgani sababli samarasizroq bo‘lgan.
Izoh (0)