Украина Исроилдан «Темир гумбаз» ракетага қарши мудофаа тизимини сотиб олмоқчи. Бу ҳақда Украинанинг Исроилдаги элчиси Евгений Корнийчук маълум қилди, деб ёзмоқда The Jerusalem Post.
Корнийчукнинг айтишича, Украинадаги ҳарбий амалиётлар мавзуси Исроил матбуотидан деярли бутунлай чиқиб кетган. Унинг фикрича, бу ҳукуматнинг содир бўлаётган воқеалардан хавотирлари ва Украина масаласини «иккинчи планга қўйиш» истагини акс эттиради.
«Исроил ҳукумати ўз комфорт зонасидан чиқиб, реалликка қайтишини истайман», — деди элчи. «Бизга Исроилнинг ёрдами, яъни ҳарбий техник ёрдам керак; бизга ‘Темир гумбаз’ зарур».
Шу билан бирга, Корнийчук Киевга «эҳсон» керак эмаслигини, аксинча у ракетага қарши мудофаа тизимини сотиб олмоқчи эканини таъкидлади.
Бироқ Jerusalem Post манбаларига таяниб, Исроил АҚШ билан мудофаа маҳсулотлари экспортини тартибга солувчи келишувлар, шунингдек, бундай маҳсулотларнинг экспорт назорати соҳасидаги халқаро мажбуриятлари туфайли «Темир гумбаз»ни Украина ёки бошқа давлатга сотиши даргумон, деб ёзмоқда.
«Темир гумбаз» ракетага қарши мудофаа тизимини Украинага ўтказиш масаласи 2021 йил сентябрида ҳам кўтарилган эди. Ўшанда Politico манбасига таяниб, америкалик конгрессменларнинг баъзилари Киевга иккита шундай тизимни етказиб беришни таклиф қилганини ёзган. Нашр суҳбатдошига кўра, бу «Украинанинг Россиядан бўлаётган таҳдидни зарарсизлантиришга» ёрдам бериши керак эди.
Россиянинг Украинадаги босқини бошланганидан бери Исроил мамлакатга гуманитар ёрдам, шунингдек, ўқ ўтказмайдиган жилет ва дубулға каби жиҳозлар етказиб берди. Бироқ Корнийчук бу таъминотда муаммолар борлигини айтган. Унинг сўзларига кўра, Исроил Украина сўраганидан анча кам жилет ва дубулға жўнатган, шунингдек, маҳсулотлар бешинчи эмас, учинчи тоифада бўлгани сабабли самарасизроқ бўлган.
Изоҳ (0)