БМТ Бош котибининг матбуот котиби Стефан Дюжаррик 7 июнь куни ўтаказилган брифингда «БМТда Киевнинг Россия Украина ғалласини экспорт қилаётгани ҳақидаги айбловини тасдиқлайдиган маълумотлар йўқ»лигини маълум қилди.
«Бирлашган Миллатлар Ташкилоти расмийлари оммавий ахборот воситаларидаги хабарларни кўрди ва бу масалани Жаҳон озиқ-овқат дастуридаги (World Food Programm) ҳамкасблари билан муҳокама қилди», - дейди Дюжаррик. У «уларда бу айбловни тасдиқлашнинг имкони йўқ» дея қўшимча қилган.
Дюжаррикнинг таъкидлашича, БМТ бутун дунёдаги одамларнинг эҳтиёжларини қондириш учун Қора денгиз бўйлаб эркин озиқ-овқат савдо зонасини яратиш тарафдори.
30 май куни Украина қишлоқ хўжалиги вазири ўринбосари Тарас Висоцкий Россия Донецк, Луганск, Херсон, Запорожье ва Харьков вилоятларидан олинган ярим миллион тоннага яқин донни экспорт қилганини маълум қилди. Украина Аграр сиёсат ва озиқ-овқат вазири Николай Солский ҳам Россия томонини дон ўғирлашда айблади.
Бундан бир кун олдин эса New York Times АҚШ май ойи ўрталарида 14 давлатга (асосан Африка мамлакатлари) Россия «ўғирланган Украина донини» сотишга уринётгани ҳақида огоҳлантириш юборгани ҳақида хабар берди. Бир неча давлат вакилларининг NYT’га маълум қилишича, Вашингтон улардан ноқонуний йўллар билан олинган Украина донини сотиб олишга рухсат бермасликни сўраган.
Бирлашган Миллатлар Ташкилоти Украина портларида миллионлаб тонна дон тўпланганини, бироқ ҳарбий ҳаракатлар туфайли уларни олиб чиқа бўлмаслигини айтди — бунга Россия кучлари томонидан портларнинг блокада қилингани тўсқинлик қилмоқда. АҚШ ва бошқа ҳукуматларнинг фикрича, Россиянинг Украинадаги ҳаракатлари озиқ-овқат инқирозини янада кучайтирди. Италия ташқи ишлар вазири Луиджи Ди Майо дон етказиб бериш муаммолари давом этса, «озиқ-овқат уруши» хавфи юз беришидан огоҳлантирди.
Москва, ўз навбатида, Ғарбнинг «ноқонуний ҳаракатлари» дон етказиб беришнинг блокада қилинишига олиб келганини, дон экспортини қайта тиклаш учун уларни (санкцияларни) бекор қилиш кераклигини таъкидламоқда. Россия ҳукумати, шунингдек, Украина портлари ва улар ёнида жойлашган акваториялар (сув омбори юзаси ҳамда сув майдонлари) миналанганини ва савдо кемалари портлатилиши мумкинлигини ҳам билдирган. Май ойи охирида Россия Мудофаа вазирлиги Қора ва Азов денгизларидаги портлардан чет эл кемаларининг чиқиши учун йўлаклар очилишини эълон қилганди. Шу билан бирга, Владимир Путин «дон ортилган кемаларнинг тўсиқсиз ўтишини осонлаштиришга тайёрлигини» ҳам маълум қилган эди.
Изоҳ (0)