May oyida asosiy turdagi qishloq xo‘jaligi va go‘sht mahsulotlarining ulgurji narxlari o‘zgarishi yuzasidan tahliliy ma’lumot tayyorlandi. Bu haqida Iqtisodiy taraqqiyot va kambag‘allikni qisqartirish vazirligi xabar berdi.
May oyida bozorda qulupnay 65 ming so‘mga, bulg‘or qalampiri (yashil) 14 ming so‘mga, sarimsoq piyoz 13,5 ming so‘mga, bodring 6,5 ming so‘mga, qizil pomidor 6 ming so‘mga, pushti pomidor 5,5 ming so‘mga, mahalliy olma 5 ming so‘mga, import olma 2,5 ming so‘mga, lavlagi 2,75 ming so‘mga, turp 600 so‘mga hamda karam 250 so‘mga arzonlashgan.
Shu bilan birga, limon 14 ming so‘mga, lazer guruch 7 ming so‘mga, mandarin 5 ming so‘mga, bulg‘or qalampiri (qizil) 2,5 ming so‘mga, guruch (alanga) 2 ming so‘mga, piyoz (yangi hosil) 550 so‘mga, kartoshka (yangi hosil) 500 so‘mga va kartoshka (import) 100 so‘mga oshgan.
Davlat bojxona qo‘mitasining tezkor ma’lumotlariga asosan, 2022-yilning mayida umumiy qiymati 95,2 mln dollarlik (o‘tgan yilning mos davriga nisbatan 10,4 mln dollar kam) jami 212,4 ming tonna (13,5 ming tonna ko‘p) qishloq xo‘jaligi mahsulotlari eksporti amalga oshirildi.
Xususan, mazkur davrda 90,1 ming tonna piyoz, 18,4 ming tonna gilos, 17,1 ming tonna karam, 15,6 ming tonna pomidor, 11,0 ming tonna sabzi, 6,8 ming tonna lavlagi, 6,0 ming tonna mosh, 4,9 ming tonna ko‘kat, 4,8 ming tonna loviya, 3,8 ming tonna mayiz va 3,3 ming tonna tarvuz tashqi bozorlarga yetkazib berilgan.
May oyida 9,9 mln dollar (o‘tgan yilning mos davriga nisbatan 0,9 mln dollar kam) qiymatdagi jami 40,4 ming tonna (23,6 ming tonna kam) qishloq xo‘jaligi mahsulotlari, xususan 28,8 ming tonna kartoshka, 6,2 ming tonna banan, 1,7 ming tonna olma, 0,6 ming tonna apelsin, 0,2 ming tonna kivi va 0,1 ming tonna mandarin import qilingan.
“Qo‘yliq” bozoriga o‘tgan oyda hududlardan jami 34,9 ming tonna, xususan, 12,5 ming tonna kartoshka, 15 ming tonna piyoz, 12 ming tonna karam va 6,3 ming tonna sabzi keltirilgan. Xususan mahsulotlar kesimida tahlil qilinganda:
- Surxondaryodan 6 687 tonna, Toshkent viloyatidan 570 tonna, Namangandan 234 tonna va Samarqanddan 10 tonna kartoshka;
- Surxondaryodan 14 542 tonna, Toshkent viloyatidan 230 tonna va Samarqanddan 181 tonna piyoz;
- Toshkent viloyatidan 1 160 tonna sabzi;
- Toshkent viloyatidan 1 342 tonna, Andijondan 868 tonna, Qashqadaryodan 863 tonna, Jizzaxdan 843 tonna, Surxondaryodan 745 tonna, Buxorodan 658 tonna, Xorazmdan 517 tonna hamda Sirdaryodan 492 tonna sabzi mahsulotlari yetkazib berilgan.
Bundan tashqari “Qo‘yliq” bozoriga Pokistondan 4,5 ming tonna, Eron davlatidan 430 tonna, Qozog‘istondan 52 tonna va Afg‘onistondan 14 tonna kartoshka keltirilgan.
Hududlardan “Chorsu” dehqon bozoriga may oyida jami 326,5 tonna, shu jumladan 265,5 tonna mol go‘shti va 61 tonna qo‘y go‘shti keltirib sotilgan.
Avvalroq O‘zbekiston Mo‘g‘ulistondan go‘sht importini oshirishga kelishib olgani haqida xabar berilgan edi.
Izoh (0)