Tibbiy-ijtimoiy xizmatlarni rivojlantirish agentligi tomonidan 4-iyun kuni Sirdaryo va Jizzax viloyatlaridagi nogironligi bor shaxslar “Muruvvat” internat uyi, keksalar va urush faxriylari uchun sog‘lomlashtirish maskanlariga press-tur tashkil etildi. Tadbir doirasida o‘tkazilgan matbuot anjumanida agentlik direktorining birinchi o‘rinbosari Bahodir Karimov O‘zbekistonda “Keksalar bog‘chasi” yo‘lga qo‘yilishini aytdi. Bu haqda “Daryo” muxbiri xabar bermoqda.
“Biz Rossiya, Litva, Polsha, Yaponiya kabi ko‘plab davlatlarda bo‘lib, ulardagi tajribani o‘rganganmiz. U yerlarda bunday muassasalar faoliyat yuritar ekan. Germaniya, Isroilda ham bunday tajriba borakan. Biz ham nuroniylarning bo‘sh vaqtlarini mazmunli tashkil etish, sog‘liklarini tiklash, tengdoshlari bilan suhbatlashishi uchun ‘Keksalar bog‘chasi’ni yo‘lga qo‘yishni rejalashtirganmiz.
Bunday markazlar pulli xizmat ko‘rsatadi. Shaxsan o‘zim Yaponiyada shunday joylarni ko‘rganman. Farzandlar otasi yoki onasini ertalab tashlab ketadi, u yerda shifokorlar sog‘lig‘ini nazorat qilib, zarur yordamlar beradi va sog‘lomlashtiruvchi mashg‘ulotlarni olib boradi. Qisqasi, nuroniylar grafik asosida kun o‘tkazadi.
Bizda mentalitetga bog‘lab bunday loyihalarni noto‘g‘ri talqin qiluvchilar afsuski ko‘pchilikni tashkil etadi. Farzand va nabiralar ishga, o‘qishga ketsa, keksa odam uyda bir o‘zi qoladi. Bunday paytlarda ular ruhiy tushkunlikka tushib, kasal bo‘lib qolishi ham mumkin.
Biz avvaliga 50 o‘rinli ‘Keksalar bog‘chasi’ tashkil qilmoqchi edik. Ammo bosh vazir 100 o‘rinli qurish taklifini berdi. Ayni paytda Toshkent shahrida 100 o‘rinli, Namangan viloyatida 120 o‘rinli ‘Keksalar bog‘chasi’ qurilmoqda. Mazkur ikkita loyiha kelgusi yildan ishga tushishi rejalashtirilmoqda”, — deydi Bahodir Karimov.
Izoh (0)