Тиббий-ижтимоий хизматларни ривожлантириш агентлиги томонидан 4 июнь куни Сирдарё ва Жиззах вилоятларидаги ногиронлиги бор шахслар «Мурувват» интернат уйи, кексалар ва уруш фахрийлари учун соғломлаштириш масканларига пресс-тур ташкил этилди. Тадбир доирасида ўтказилган матбуот анжуманида агентлик директорининг биринчи ўринбосари Баҳодир Каримов Ўзбекистонда «Кексалар боғчаси» йўлга қўйилишини айтди. Бу ҳақда «Дарё» мухбири хабар бермоқда.
«Биз Россия, Литва, Польша, Япония каби кўплаб давлатларда бўлиб, улардаги тажрибани ўрганганмиз. У ерларда бундай муассасалар фаолият юритар экан. Германия, Исроилда ҳам бундай тажриба боракан. Биз ҳам нуронийларнинг бўш вақтларини мазмунли ташкил этиш, соғликларини тиклаш, тенгдошлари билан суҳбатлашиши учун «Кексалар боғчаси»ни йўлга қўйишни режалаштирганмиз.
Бундай марказлар пулли хизмат кўрсатади. Шахсан ўзим Японияда шундай жойларни кўрганман. Фарзандлар отаси ёки онасини эрталаб ташлаб кетади, у ерда шифокорлар соғлиғини назорат қилиб, зарур ёрдамлар беради ва соғломлаштирувчи машғулотларни олиб боради. Қисқаси, нуронийлар график асосида кун ўтказади.
Бизда менталитетга боғлаб бундай лойиҳаларни нотўғри талқин қилувчилар афсуски кўпчиликни ташкил этади. Фарзанд ва набиралар ишга, ўқишга кетса, кекса одам уйда бир ўзи қолади. Бундай пайтларда улар руҳий тушкунликка тушиб, касал бўлиб қолиши ҳам мумкин.
Биз аввалига 50 ўринли «Кексалар боғчаси» ташкил қилмоқчи эдик. Аммо Бош вазир 100 ўринли қуриш таклифини берди. Айни пайтда Тошкент шаҳрида 100 ўринли, Наманган вилоятида 120 ўринли «Кексалар боғчаси» қурилмоқда. Мазкур иккита лойиҳа келгуси йилдан ишга тушиши режалаштирилмоқда», — дейди Баҳодир Каримов.
Изоҳ (0)