Ayni paytda respublikada 164 ta oliy ta’lim muassasasi (OTM) faoliyat yuritayotgan bo‘lib, 2026-yilgacha ular soni 200 taga yetkaziladi. Bu haqda bugun, 7-iyun kuni o‘tkazilayotgan Oliy Majlis qonunchilik palatasi yig‘ilishida Oliy ta’lim vaziri Abduqodir Toshqulov aytib o‘tdi.
Abduqodir Toshqulovning ma’lum qilishicha, OTMlar va talabalar soni yil sayin ortib bormoqda.
“2016-yilda O‘zbekistonda 77 ta oliy ta’lim muassasi faoliyat ko‘rsatgan va ularda talabalar qamrovi ham hozirgidan ancha kam edi. Ayni paytda OTMlari soni 164 taga yetdi. Masalan, o‘tgan haftada ham 2 ta universitet ochildi. 2026-yilgacha OTMlari sonini 200 taga yetkazish rejalashtirilgan. Albatta, ular soni ortsa, talabalar ham ko‘payib boradi. 2017-yilda men boshqargan Termiz davlat universitetida 6 ming nafar talaba o‘qirdi. 2021-yilga kelib, u yerni 23 ming talaba bilan yangi rahbarga topshirganmiz. Hozirda bu raqamlar 30 minga qarab boryapti. Ya’ni faoliyat ko‘rsatayotgan OTMlarida ham talabalar soni 4-5 barobarga ko‘paydi. Mamlakatda talabalar soni bugun 850 ming nafarga yetdi. Bu umumiy – kunduzgi, kechgi va sirtqi ta’limni qamrab olgan raqam. Xususan, kunduzgi ta’limda 512 ming nafar talaba tahsil olmoqda” – dedi vazir.
Avvalroq O‘zbekiston OTMlariga qabul kvotalarini tasdiqlashga oid qaror loyihasi muhokamaga qo‘yilgani xabar qilingandi.
Izoh (0)