Toshkent viloyatining Ohangaron tumanida YHXB inspektori tomonidan mashinasi jarima maydoniga olib ketilayotgan vaqtda haydovchi avtomobildan o‘zini tashlab yuborib, vafot etgani to‘g‘risida xabar berilgandi. Bosh prokuratura matbuot kotibining ma’lum qilishicha, holat marhumning o‘limi sabablarini aniqlash maqsadida sudga oid tibbiy ekspertiza tayinlangan.
Ta’kidlanishicha, hozirda Ohangaron tumanida YHXB inspektorlari va haydovchi o‘rtasidagi vaziyat hamda haydovchining o‘limi bilan bog‘liq holat yuzasidan tuman prokuraturasi tomonidan tergovga qadar tekshiruv harakatlari olib borilmoqda.
Marhumning o‘limi sabablarini aniqlash maqsadida sudga oid tibbiy ekspertiza tayinlangan.
“Holatga aniqlik kiritish uchun YHXB xodimlariga biriktirilgan bodikamerada aks ettirilgan videotasvirlar olingan. YXHB xodimlarining xatti-harakatlari yuzasidan xizmat tekshiruvi tayinlangan. Mazkur holat har tomonlama, to‘la va xolisona tekshirib chiqiladi va natijasi haqida qo‘shimcha xabar qilinadi”, — deyiladi munosabatda.
Avvalroq Samarqandda chet el fuqarolariga elektroshoker qo‘llash bilan bog‘liq voqeadan so‘ng 4 nafar xodim tizimdan bo‘shatilgani, Andijonda uch nafar shaxs YPX xodimi bilan janjallashib, ratsiyasi, nishoni va planshetini olib qo‘ygani, Chiroqchida YPX xodimlariga qarshilik ko‘rsatgan shaxslar hibsga olingani to‘g‘risida xabar berilgandi.
Izoh (0)