Sud qarori — 15 mln dollar: Jonni Depp bilan bo‘lgan sud jarayonidan keyin Ember Xyordni nima kutmoqda?

Sobiq juftlik Jonni Depp va Ember Xyord o‘rtasidagi olti yillik sud jarayoni nihoyat tugadi. Hakamlar hay’ati Xyordni sobiq eriga tuhmat qilganlikda aybdor deb topdi. Endi u mashhur Jek Chitakka 15 million dollar to‘lashi shart. Sobiq eri so‘raganidek bo‘lmasa-da, bu ham ancha katta miqdor — aktyor o‘z murojaatida tuhmat qilganlik uchun 50 million dollar talab qilgan.

Ammo Deppga ham sobiq sevgilisiga 2 million dollar to‘lash majburiyati yuklangan. Dunyodagi eng shov-shuvli ikki oylik sud jarayoni nafaqat sobiq turmush o‘rtoqlar o‘rtasidagi qonuniy tortishuv, balki ingliz tilini bilmaydiganlar uchun tilni o‘rganishga arziydigan haqiqiy shou bo‘ldi. Endi aktyorlarning muxlislari suddan keyin Depp va Xyordni nimalar kutayotgani bilan qiziqmoqda. Mutaxassislar fikricha, yuz berishi mumkin bo‘lgan to‘rtta ssenariy bor.

1-ssenariy: Sud qarori ustidan shikoyat kiritish

Ember ijobiy qaror qabul qilish uchun sud hukmi ustidan shikoyat qilish huquqiga ega. Shunday bo‘lishining ehtimoli katta, ammo Xyord tomoni aynan qachon va nimaga asoslanib apellyatsiya berishi ma’lum emas.

Bunday holda aktrisadan 10,35 million dollarlik garov qo‘yish talab qilinadi, bu miqdorga ma’lum foizlar qo‘shiladi. Kentukkilik advokat Sandra Sperjin va atlantalik advokat Brayan Pastor bunday yechim haqida aytib o‘tishdi. Mutaxassisning ta’kidlashicha, Ember garov pulini berishdan bosh tortishi mumkin, bu esa Deppga sud qarorini bajarishga imkon beradi.

Ammo boshqa advokat Eleyn Charlson Bredexoft Today shousida talab qilinadigan garov puli Xyordda “mutlaqo yo‘q”ligini ta’kidladi.

2-ssenariy: Daromadlarni muzlatish

Endi Xyordning karyerasi Depp bilan uzoq davom etgan sud jarayoni tufayli boshi berk ko‘chaga kirib qoldi, natijada u sud qarori bo‘yicha to‘lovni amalga oshirish uchun yetarli pulga ega bo‘lmasligi mumkin. Uning daromadi, shu jumladan kelajakda bo‘lishi mumkin bo‘lgani ham butunlay muzlatilishi mumkin.

CBS News eksperti Jessika Levinsonning aytishicha, Xyord kerakli miqdordagi puli yo‘qligini ochiq aytsa va buni bank hisoblari bilan tasdiqlasagina daromadini muzlatish mumkin. Ammo Xyordning salohiyati haqida unutmaslik kerak: u juda iqtidorli va talabgir aktrisa. Agar uning karyerasi ko‘p yillik sud va obro‘si tushib ketgani hisobiga tugamasa, u daromadining bir qismini bo‘lib berish yo‘li bilan qarzini asta-sekin to‘lashi mumkin.

3-ssenariy: Bankrotlik

Xyord Deppga kerakli pulni to‘lamaslik uchun o‘zini bankrot deb e’lon qilishi ham mumkin. Biroq Amerika bankrotlik to‘g‘risidagi qonuniga ko‘ra, “qarzdor tomonidan atayin va qasddan zarar yetkazish” natijasida kelib chiqadigan qarzlar boshqa tomonga ajratiladi. Advokat Brayan Pastorning so‘zlariga ko‘ra, Depp qonunning ushbu qismiga asoslanib, sobiq rafiqasi qarzini bankrotlik yo‘li bilan o‘zidan olib tashlashiga qarshi chiqishi mumkin.

Advokatning so‘zlariga ko‘ra, Depp Xyord qarzining ketidan quvsa, kelajakdagi gonorarlarini yo‘qotishi mumkinligini yaxshi tushunadi.

“Depp kabi odamning asosiy muammosi shundaki, amaliy nuqtayi nazardan siz katta gonorar olib keladigan filmlarda suratga tushishni xohlaysiz. Shuning uchun siz uchun eng muhimi 10,35 million dollar emas, bu 10, 20, 30 million dollar maosh olish uchun imkoniyat xolos”, — deydi advokat Brayan.

4-ssenariy: Deppning sud qarorini rad etishi

Dramaning eng optimistik natijasi ham bor. Jonni Depp pul kompensatsiyasini rad etib, sud hukmini bajarmaslikka qaror qilishi mumkin.

Brayan Pastorning qo‘shimcha qilishicha, agar Xyord Depp bilan kelisha olsa, bu to‘lovni kamaytirish yoki undan butunlay voz kechish bo‘yicha muzokara olib borishi mumkin.

“Depp allaqachon jamoatchilik fikrini qo‘lga kiritdi”, — deb xulosa qildi advokat.

Qizig‘i shundaki, Depp sud hukmidan so‘ng ijtimoiy tarmoqlardagi Xyorddan 15 million dollarni talab qiladimi yoki yo‘qmi, izoh bermagan. “Bu ishni olib borishdan maqsad, natijasi qanday bo‘lishidan qat’i nazar, haqiqatni oshkor qilish edi”, — degan olijanoblik bilan aktyor. Demak, sud jarayonidan keyin Xyordni nima kutayotgani hozircha ma’lum emas.