Tashqi ishlar vaziri v.b. Vladimir Norov 3-iyun kuni O‘zbekistonga tashrif bilan kelgan Yevropada xavfsizlik va hamkorlik tashkilotining (YXHT) amaldagi raisi, Polsha tashqi ishlar vaziri Zbignev Rau boshchiligidagi delegatsiyani qabul qildi, deb xabar bermoqda “Daryo” muxbiri.
Uchrashuvda O‘zbekiston va YXHT o‘rtasidagi hamkorlikning hozirgi holati va istiqbollari, shuningdek, O‘zbekiston-Polsha munosabatlarini yanada faollashtirish masalalari muhokama qilindi. Tashkilot faoliyatining barcha uch ustuvor yo‘nalishi bo‘yicha YXHT institutlari bilan hamkorlik jadal rivojlanayotgani mamnuniyat bilan qayd etildi.
Uchrashuvda ilg‘or texnologiyalar va innovatsiyalarni jalb etish, “yashil” iqtisodiyotni rivojlantirish va Orol dengizining qurishi oqibatlarini yumshatish, shuningdek, demokratik institutlarni rivojlantirish, saylov qonunchiligini takomillashtirish va boshqa sohalarda qo‘shma loyihalarni amalga oshirishga alohida e’tibor qaratildi.
YXHT vakillari o‘zaro manfaat kasb etadigan sohalarda qo‘shimcha aniq loyihalarni ishlab chiqish orqali O‘zbekiston bilan hamkorlikni chuqurlashtirishga tayyor ekanligini ma’lum qildi.
Muloqot chog‘ida, shuningdek, O‘zbekiston va Polsha o‘rtasidagi ikki tomonlama siyosiy, savdo-iqtisodiy, investitsiyaviy va madaniy gumanitar hamkorlikni yanada kengaytirish masalalari atroflicha muhokama qilindi. So‘nggi yillarda O‘zbekiston bilan Polsha o‘rtasidagi ikki tomonlama munosabatlar barcha sohalarda jadal rivojlanib, kengayib borayotgani ta’kidlandi.
Polsha ishbilarmonlarining har ikki mamlakat o‘rtasidagi savdo-iqtisodiy va investitsiyaviy sohalardagi hamkorlik salohiyatidan yanada faol foydalanishga qiziqishi ortib borayotgani alohida ta’kidlandi. Shu nuqtayi nazardan Polshaning yetakchi kompaniyalari delegatsiyalarining O’zbekistonga tashrifini tashkillashtirish yuzasidan fikr almashildi.
Muloqot chog‘ida mintaqaviy va global kun tartibining dolzarb masalalari ham ko‘rib chiqildi.
Uchrashuvda 2022-2026-yillarga mo‘ljallangan madaniyat, fan, oliy ta’lim, ma’rifat va sport sohalaridagi Hukumatlararo ijro dasturi imzolandi. Hujjatda ikki davlatning tegishli vazirlik va idoralari o‘rtasidagi hamkorlikning asosiy yo‘nalishlari belgilab berilgan.
YXHT amaldagi raisi, Polsha tashqi ishlar vaziri Zbignev Rau O‘zbekistonga 2-iyun kuni tashrif buyurgandi. Shavkat Mirziyoyev 3-iyun kuni tongda, Urganch shahriga jo‘nab ketishdan avval uni qabul qilib, xalqaro siyosat, jumladan, Yevropa ittifoqi bilan ko‘p tomonlama munosabatlarni rivojlantirish, Afg‘onistonda tinchlikni ta’minlash va uning ijtimoiy-iqtisodiy tiklanishiga ko‘maklashish masalalari yuzasidan fikr almashgandi.
Shuningdek, O‘zbekiston va YXHT o‘rtasidagi ko‘p qirrali hamkorlikni yanada rivojlantirish, O‘zbekiston—Polsha munosabatlarini kengaytirish masalalari hamda dolzarb xalqaro kun tartibi ko‘rib chiqilgan.
Zbignev Rau 4-iyungacha Senat va Qonunchilik palatasi rahbarlari Tanzila Norboyeva va Nurdinjon Ismoilov ham bilan uchrashishi kutilmoqda.
Izoh (0)