Ташқи ишлар вазири в.б. Владимир Норов 3 июнь куни Ўзбекистонга ташриф билан келган Европада хавфсизлик ва ҳамкорлик ташкилотининг (ЕХҲТ) амалдаги раиси, Польша ташқи ишлар вазири Збигнев Рау бошчилигидаги делегацияни қабул қилди, деб хабар бермоқда «Дарё» мухбири.
Учрашувда Ўзбекистон ва ЕХҲТ ўртасидаги ҳамкорликнинг ҳозирги ҳолати ва истиқболлари, шунингдек, Ўзбекистон-Польша муносабатларини янада фаоллаштириш масалалари муҳокама қилинди. Ташкилот фаолиятининг барча уч устувор йўналиши бўйича ЕХҲТ институтлари билан ҳамкорлик жадал ривожланаётгани мамнуният билан қайд этилди.
Учрашувда илғор технологиялар ва инновацияларни жалб этиш, «яшил» иқтисодиётни ривожлантириш ва Орол денгизининг қуриши оқибатларини юмшатиш, шунингдек, демократик институтларни ривожлантириш, сайлов қонунчилигини такомиллаштириш ва бошқа соҳаларда қўшма лойиҳаларни амалга оширишга алоҳида эътибор қаратилди.
ЕХҲТ вакиллари ўзаро манфаат касб этадиган соҳаларда қўшимча аниқ лойиҳаларни ишлаб чиқиш орқали Ўзбекистон билан ҳамкорликни чуқурлаштиришга тайёр эканлигини маълум қилди.
Мулоқот чоғида, шунингдек, Ўзбекистон ва Польша ўртасидаги икки томонлама сиёсий, савдо-иқтисодий, инвестициявий ва маданий гуманитар ҳамкорликни янада кенгайтириш масалалари атрофлича муҳокама қилинди. Сўнгги йилларда Ўзбекистон билан Польша ўртасидаги икки томонлама муносабатлар барча соҳаларда жадал ривожланиб, кенгайиб бораётгани таъкидланди.
Польша ишбилармонларининг ҳар икки мамлакат ўртасидаги савдо-иқтисодий ва инвестициявий соҳалардаги ҳамкорлик салоҳиятидан янада фаол фойдаланишга қизиқиши ортиб бораётгани алоҳида таъкидланди. Шу нуқтаи назардан Польшанинг етакчи компаниялари делегацияларининг Ўзбекистонга ташрифини ташкиллаштириш юзасидан фикр алмашилди.
Мулоқот чоғида минтақавий ва глобал кун тартибининг долзарб масалалари ҳам кўриб чиқилди.
Учрашувда 2022-2026 йилларга мўлжалланган маданият, фан, олий таълим, маърифат ва спорт соҳаларидаги Ҳукуматлараро ижро дастури имзоланди. Ҳужжатда икки давлатнинг тегишли вазирлик ва идоралари ўртасидаги ҳамкорликнинг асосий йўналишлари белгилаб берилган.
ЕХҲТ амалдаги раиси, Польша ташқи ишлар вазири Збигнев Рау Ўзбекистонга 2 июнь куни ташриф буюрганди. Шавкат Мирзиёев 3 июнь куни тонгда, Урганч шаҳрига жўнаб кетишдан аввал уни қабул қилиб, халқаро сиёсат, жумладан, Европа иттифоқи билан кўп томонлама муносабатларни ривожлантириш, Афғонистонда тинчликни таъминлаш ва унинг ижтимоий-иқтисодий тикланишига кўмаклашиш масалалари юзасидан фикр алмашганди.
Шунингдек, Ўзбекистон ва ЕХҲТ ўртасидаги кўп қиррали ҳамкорликни янада ривожлантириш, Ўзбекистон—Польша муносабатларини кенгайтириш масалалари ҳамда долзарб халқаро кун тартиби кўриб чиқилган.
Збигнев Рау 4 июнгача Сенат ва Қонунчилик палатаси раҳбарлари Танзила Норбоева ва Нурдинжон Исмоилов ҳам билан учрашиши кутилмоқда.
Изоҳ (0)