Namanganda joriy yilning 16—29-may kunlari bo‘lib o‘tgan saylovlarda mahalla raislarining 332 nafari yoki 42 foiz qayta saylandi. Bu haqda viloyat Mahalla va oilani qo‘llab-quvvatlash boshqarmasi boshlig‘i Ahmadjon A’loxo‘jayev ma’lum qildi, deya xabar beradi “Daryo” muxbiri Azizbek Abduvaliyev.
Saylovlarda aholi tomonidan ma’qullangan nomzodlarning 450 nafari yoki 58 foizi ilk marotaba mahalla raisligiga saylanganlar hisoblanadi.
“Vakolatini topshirgan sobiq mahalla raislarini ham unutib qo‘yganimiz yo‘q. Joylarda ularni to‘plab, dasturxon yozib, minnatdorligimizni bildiryapmiz, qilgan mehnatlarini e’tirof etyapmiz. Yangi raislarga ko‘mak va maslahat berishlarini so‘rayapmiz”, — deydi Ahmadjon A’loxo‘jayev.
Qayd etilishicha, yangi saylangan mahalla raislarining 230 nafari yoki qariyb 30 foizi o‘qituvchilar. 113 nafari yoki 14,5 foizi ayollardan iborat. 18 nafari xalq deputatlari viloyat, shahar va tumanlar kengashlari deputatlari.
“Saylovlar ochiq-oshkora va adolatli o‘tishi uchun barcha sa’y-harakatlar qilindi. Saylov jarayonlari ommaviy axborot vositalari yoki ijtimoiy tarmoqlar orqali to‘g‘ridan-to‘g‘ri efirga uzatilgan holatlar ham ko‘p bo‘ldi”, — deydi Ahmadjon A’loxo‘jayev.
Ma’lumot uchun, Namanganda yangi saylangan mahalla raislarining 747 nafari yoki 95 foizdan ortig‘i oliy ma’lumotli hisoblanadi.
Izoh (0)