Тошкент шаҳар ҳокими Жаҳонгир Ортиқхўжаевнинг 30 майдаги қарори билан «Тошкент-2» халқаро терминали ва ички қатновлар учун мўлжалланган «Тошкент-3» терминалининг автотураргоҳлари, шунингдек, пойтахт аэропорти ҳудудига туташ жойлардаги автотураргоҳлар Uzbekistan Airports балансига ўтказилади. Бу ҳақда аэропорт матбуот хизмати хабар берди.
Мазкур ҳудудларни компания ихтиёрига ўтказиш президентнинг 2021 йил 30 апрелдаги «Фуқаролик авиацияси корхоналарини трансформация қилиш ва қўллаб-қувватлаш чора-тадбирлари тўғрисида»ги қарорида кўзда тутилган эди.
«Ушбу ҳудудларнинг ўтказилиши автотураргоҳларни автоматлаштириш, аэровокзал олдидаги ҳудудларни қайтадан қулай лойиҳалаштириш, йўловчиларни кутиб олувчилар ва кузатувчилар учун кўпроқ қулайликлар яратиш ҳамда ўз ечимини кутаётган такси хизмати билан боғлиқ муаммоларни ҳал қилиш имконини беради. Автотураргоҳларда тўхташ жойи учун тўловни инсон омилисиз амалга ошириш имконини берувчи автоматлаштирилган тизимни жорий этиш режалаштирилмоқда. Шунингдек, компания автотураргоҳларнинг жойлашуви ва улардан фойдаланиш давомийлигини (соат, сутка) ҳисобга олган ҳолда мослашувчан тариф тизимини ишлаб чиқмоқда», — деди Uzbekistan Airports бошқаруви раиси Раъно Жўраева.
Таъкидланишича, кейинчалик Давлат активларини бошқариш агентлиги томонидан автотураргоҳларни баҳолаш ва акциядорлик жамиятининг давлат улушини ошириш бўйича тегишли буйруқ қабул қилинади. Шундан сўнг тегишли тартибда ягона акциядор — Молия вазирлиги томонидан давлат компаниянинг улушини ошириш ва автотураргоҳлар қийматини устав капиталига киритиш тўғрисида қарор қабул қилинади. Барча амалга оширилган ишлар якуни бўйича кадастр ҳужжатларини Кадастр агентлиги томонидан «Муниципал мулкларни бошқариш маркази» ДУКдан Uzbekistan Airports АЖ номига қайта расмийлаштириш амалга оширилади.
Эслатиб ўтамиз, 2021 йилнинг декабрида Uzbekistan Airports раҳбари Тошкент аэропорти олдида турли нархлардаги автотураргоҳни ташкил этиш режалаштирилганини маълум қилганди. «Бу борадаги ишларни июлда бошлаганмиз, тураргоҳларни қайта жиҳозлаш ва зарурий IT-тизимларни ўрнатишни режалаштиргандик. Афсуски, ушбу ер майдонлари бизга топширилмагани сабаб муаммолар юзага келди. Ҳозирда у ҳокимликка тегишли» — дейган эди Раъно Жўраева.
Изоҳ (0)