Бухоро шаҳрига "Биринчи туркий дунё ёшлари пойтахти" мақоми берилди (фото ва видео)

Бухорода Туркий давлатлар ташкилотига аъзо мамлакатлар ёшлари иштирокида IV «Ёш лидерлар» форуми бўлиб ўтди. Форумда Бухоро шаҳри биринчи туркий дунё ёшлари пойтахти, деб эълон қилинди, дея хабар бермоқда «Дарё» мухбири.

Ўзбекистон Ёшлар ишлари агентлиги директори Алишер Саъдуллаевнинг сўзларига кўра, мазкур форум мақсади туркий давлатлар ташкилотининг реал салоҳиятини рўёбга чиқариш, аҳамиятини ошириш ва халқаро ҳамжамиятдаги ролини кучайтиришга қаратилган бўлиб, унга 10 мингдан ортиқ ёшлар жалб этилган.

«Ўтган йили Истанбул саммитида Ўзбекистон президенти томонидан 2022 йилни Туркий дунёда Ёшлар ташаббусларини қўллаб-қувватлаш йили деб эълон қилиш ташаббуси илгари сурилган эди. Бу ташаббус барча қардошлар томонидан қўллаб-қувватланди. Шу асосда ўтказилаётган мазкур форум бир неча минг йиллик қардош халқлар ёшларининг ўзаро алоқаларини янада ривожлантиришда жуда муҳим бўлиб, тарихий аҳамият касб этади», — деди Алишер Саъдуллаев.

Таъкидланишича, форумда иштирок этиш учун Туркия, Озарбайжон, Қозоғистон, Қирғизистон, Туркманистон ва Венгрия давлатидан ёшлар ҳамда делегация аъзолари келган.

Форумда «Байкар Макина» компанияси техник директори Селчук Байракдар, Туркия Республикаси Ёшлар ва спорт вазири Меҳмет Муҳаррем Касапўғлу, Қирғизистон Республикаси маданият, ахборот, спорт ва ёшлар сиёсати вазири ўринбосари Совузбек Надирбеков, Миллий ёшлар ташкилоти кенгаши раиси Азер Алиев, Қозоғистон Республикаси Фуқаровий ташаббусларни қўллаб-қувватлаш маркази раиси ўринбосари Жасулан Бисембиев, Венгрия ректорлар маслаҳат кенгаши аъзоси Наги Денес Андрас сўзга чиқиб, форум билан боғлиқ ўз фикр-мулоҳазаларини билдиришган. Шунингдек, Туркий давлатлар ташкилоти бош котиби Багдад Амреев сўзга чиқиб, форум туркий дунёнинг буюк маданий-тарихий меросини оммалаштириш мақсадида маданий-гуманитар ҳамкорликни кучайтиришга хизмат қилишини таъкидлаган.

Форумда Бухоро шаҳри «Биринчи туркий дунё ёшлар ташаббуслари пойтахти» деб эълон қилинган. Шундан сўнг туркий давлатлар ташкилотининг «Ёш лидерлар» форуми резолюцияси имзоланиб, бу ҳақдаги сертификат Бухоро ҳокими Ботир Зариповга топширилган.

Яқинда бўлиб ўтган «Заргарлик, зардўзлик ҳамда каштадўзлик санъати» фестивалида Бухоро шаҳрига Жаҳон ҳунармандлар шаҳри мақоми берилган эди.