“Laganda tortiq qilingan taqinchoq, buxorochaga xirom aylayotgan raqqosalar”. Buxoroda o‘tkazilayotgan xalqaro festivaldan fotoreportaj

Buxoroda o‘tkazilayotgan “Xalqaro zardo‘zlik, zargarlik va kashtachilik san’ati” festivalining ikkinchi kuni “An’anaviy zardo‘zlik va zargarlik, kashtado‘zlik san’atini rivojlantirish istiqbollari” mavzusidagi ilmiy-amaliy konferensiya bilan boshlandi, deya xabar bermoqda “Daryo” muxbiri.

Ushbu anjumanda 30 nafar xorijiy, 60 nafar mahalliy ma’ruzachi qatnashdi. Jumladan, Ozarbayjon, Turkiya, Qozog‘iston, Qirg‘iziston, Tojikiston va Turkmanistondan kelgan hunarmandlar ma’ruza qildi. Unda zargarlik, zardo‘zlik va kashtado‘zlik san’ati tarixi, ularning iqtisodiyot rivojiga qo‘shgan hissasi xususida so‘z bordi.

Anjumanda qatnashgan Butunjahon hunarmandlar kengashi raisi Saad al-Qaddumiy o‘z nutqida O‘zbekistonning turli viloyatlaridan kelgan hunarmandlarning mahsulotlarini kuzatib, ularning qo‘l mehnatlariga, mahoratlariga baho berdi.

“O‘zbekistonning boshqa hududlari ham Jahon hunarmandlar shahri maqomini oladi”, —  dedi u o‘z nutqida.

Festivalning keyingi tadbirlari ham eski shaharning turli qismlarida yuqori saviyada tashkillashtirildi. Ko‘ngilochar dasturlar, milliy kuy-qo‘shiqlar va folklor dastalar, qiziqchilar chiqishlari 10 mingdan ortiq aholini atrofiga qamrab oldi. Shuningdek, savdo-sotiq uchun mo‘ljallangan rastalarga mahalliy va xorijlik usta-zargarlar  tomonidan turli tilla va kumush taqinchoqlarini savdoga qo‘yildi.

Bildirilishicha, festivalda ishtirok etish uchun xorijiy mamlakatlar zargarlari tomonidan 22 kilogramm kumush va 10 kilogramm oltin buyum mahsulotlari olib kelingan.

Festival dasturlari davom etmoqda.