AQSH prezidenti Jo Bayden iyun oyida Saudiya Arabistoniga boradi, deb xabar bermoqda The New York Times.
AQSH prezidentining Saudiya Arabistoniga safari Yevropa va Isroilga avvalroq rejalashtirilgan tashrif doirasida amalga oshiriladi, dedi Bayden ma’muriyatining rasmiylari.
Bayden Ar-Riyod shahriga tashrifi chog‘ida Saudiya valiahd shahzodasi Muhammad ibn Salmon, shuningdek, Misr, Iordaniya, Iroq va Birlashgan Arab Amirliklari kabi boshqa arab davlatlari yetakchilari bilan uchrashadi.
Prezidentlikka nomzod bo‘lgan paytida Bayden jurnalist Jamol Qoshiqchining o‘ldirilishi yuzasidan qirollikni jazolashga va’da bergan edi. Ammo hozir u neft narxini pasaytirish va shu bilan birga “Rossiyani jahon maydonida izolyatsiya qilish” maqsadida neftga boy Saudiya Arabistoni bilan munosabatlarni tiklashga intilmoqda.
Eslatib o‘tamiz, The Washington Post gazetasida ishlagan jurnalist Qoshiqchi 2018-yilning 2-oktabr kuni Saudiya Arabistonining Istanbuldagi konsulxonasida o‘ldirilgan. Jurnalistning jasadi esa haligacha topilmagan.
2021-yil fevralda chop etilgan AQSH razvedkasining maxfiy hisobotida aytilishicha, jurnalistga uyushtirilgan operatsiya Saudiya Arabistoning valiahd shahzodasi tomonidan shaxsan ma’qullangan.
Ar-Riyod versiyasiga ko‘ra, Qoshiqchi Saudiya valiahd shahzodasi Muhammad ibn Salmonning ikki yordamchisi tomonidan rejalashtirilgan operatsiya doirasida saudiyalik agentlar tomonidan o‘ldirilgan, shu sababdan yordamchilar ishdan bo‘shatilgan, shahzodaning o‘zi esa qotillikda ishtirok etmagan.
Izoh (0)