O‘ldirilgan jurnalist Jamol Qoshiqchining qaylig‘i Saudiya Arabistoni valiahd shahzodasini sudga berdi
2018-yilda o‘ldirilgan Washington Post jurnalisti Jamol Qoshiqchining qaylig‘i Hadicha Chengiz Saudiya Arabistoni valiahd shahzodasi Muhammad bin Salmonni sudga berdi. Bu haqda The New York Times’ga tayanib, Meduza xabar berdi.
Da’vo arizasida Hadicha Chengiz va Democracy for the Arab World Now (DAWN) tashkilotidan bo‘lgan inson huquqlarini himoya qilish faollari shahzodani jurnalistni o‘ldirish haqidagi buyruq berganlikda ayblamoqda va undan tovon puli talab qilmoqda. Arizada, shuningdek, Chengiz va DAWN Jamol Qoshiqchining o‘ldirilishiga aloqador deb hisoblagan Ar-Riyodning 20 nafar rasmiylari ham keltirilgan.
Saudiya Arabistonining Vashingtondagi elchixonasi vakili The New York Times gazetasining so‘roviga javob bermagan.
Eslatib o‘tamiz, Jamol Qoshiqchi The Washington Post jurnalisti bo‘lgan va o‘z maqolalarida Saudiya Arabistoni hukumatini tanqid qilgan. U 2018-yilning oktabr oyida Saudiya Arabistonining Istanbuldagi elchixonasida o‘ldirilgan. Uning jasadi hozirgacha topilmagan.
Turkiya hukumati, AQSh Senati va Markaziy razvedka boshqarmasi jurnalistni o‘ldirish haqidagi buyruqni Saudiya Arabistonining merosxo‘r shahzodasi Muhammad bin Salmon berganligini ma’lum qilgan. Saudiya Arabistoni hukumati esa jurnalistning o’limini kuch tuzilmalarining shaxsiy tashabbusi deb atagan.
Jinoyatda gumonlanganlar Saudiya Arabistoni sudiga topshirilgan. 2019-yilning dekabr oyida ularning besh nafari o‘lim jazosiga hukm qilingan, yana uch nafariga tayinlangan qamoq jazosining umumiy muddati 24 yilni tashkil etgan.
2020-yilning sentabrida besh kishiga tayinlangan o‘lim jazosi jurnalistning o‘g‘illari so‘roviga asosan qamoq jazosiga almashtirilgan. 2020-yilning may oyida jurnalistning o‘g‘illari otasining o‘limida aybdor bo‘lganlarni kechirishini ma’lum qilgan. Biroq jurnalistning do‘sti Qoshiqchining o‘g‘illari aybdorlarni kechirish haqida o‘z ixtiyori bilan ma’lum qilganiga shubha bildirgan.
