Байден июнь ойида Саудия Арабистонига ташриф буюриб, валиаҳд шаҳзода билан учрашади

АҚШ президенти Жо Байден июнь ойида Саудия Арабистонига боради, деб хабар бермоқда The New York Times.

АҚШ президентининг Саудия Арабистонига сафари Европа ва Исроилга аввалроқ режалаштирилган ташриф доирасида амалга оширилади, деди Байден маъмуриятининг расмийлари.

Байден Ар-Риёд шаҳрига ташрифи чоғида Саудия валиаҳд шаҳзодаси Муҳаммад ибн Салмон, шунингдек, Миср, Иордания, Ироқ ва Бирлашган Араб Амирликлари каби бошқа араб давлатлари етакчилари билан учрашади.

Президентликка номзод бўлган пайтида Байден журналист Жамол Қошиқчининг ўлдирилиши юзасидан қиролликни жазолашга ваъда берган эди. Аммо ҳозир у нефть нархини пасайтириш ва шу билан бирга «Россияни жаҳон майдонида изоляция қилиш» мақсадида нефтга бой Саудия Арабистони билан муносабатларни тиклашга интилмоқда.

Эслатиб ўтамиз, The Washington Post газетасида ишлаган журналист Қошиқчи 2018 йилнинг 2 октябрь куни Саудия Арабистонининг Истанбулдаги консулхонасида ўлдирилган. Журналистнинг жасади эса ҳалигача топилмаган.

2021 йил февралда чоп этилган АҚШ разведкасининг махфий ҳисоботида айтилишича, журналистга уюштирилган операция Саудия Арабистонинг валиаҳд шаҳзодаси томонидан шахсан маъқулланган.

Ар-Риёд версиясига кўра, Қошиқчи Саудия валиаҳд шаҳзодаси Муҳаммад ибн Салмоннинг икки ёрдамчиси томонидан режалаштирилган операция доирасида саудиялик агентлар томонидан ўлдирилган, шу сабабдан ёрдамчилар ишдан бўшатилган, шаҳзоданинг ўзи эса қотилликда иштирок этмаган.