Birlashgan Millatlar Tashkiloti (BMT) Turkiya tashqi ishlar vaziri Mavlud Chavusho‘g‘li tomonidan berilgan, mamlakatning chet tillardagi nomini “Turkey”dan “Türkiye”ga o‘zgartirish haqidagi iltimosnomani ma’qulladi. Bu haqda Anadolu agentligi xabar bermoqda.
1-iyun kuni Chavusho‘g‘li BMT bosh kotibi Antoniu Guterrishga murojaat qilib, xalqaro va rasmiy hujjatlarda mamlakat nomini o‘zgartirishni so‘ragandi.
BMT bosh kotibining rasmiy vakili Stefan Dyujarrik xat qabul qilinganini tasdiqladi va Turkiyaning xorijiy tillardagi nomi o‘zgarishi iltimosnoma olingan vaqtdan kuchga kirishini ma’lum qildi.
Shu tariqa, endi barcha xalqaro forumlarda va rasmiy hujjatlarda “Türkiye” (“Tyurkiye”) nomidan foydalaniladi, shu paytgacha esa “Turkey”, “Turkei”, “Turquie” kabi turli etnonimlar qo‘llanib kelingandi.
Turkiya tashqi ishlar vaziri Mavlud Chavusho‘g‘li ushbu yangi tartib-qoida Anqaraning xalqaro maydonda mamlakat nufuzini oshirishga qaratilgan chora-tadbirlari doirasida qabul qilinganini ta’kidladi.
Ta’kidlanishicha, mamlakatning avvalgi nomi hamohang bo‘lmagani sababli Anqara uni o‘zgartirishga qaror qilgan. Buning ustiga, ingliz tilida “turkey” kurka ma’nosini anglatadi.
Avvalroq Tailand qirolligi ofisi (ORST) mamlakat poytaxti Bangkok shahrining nomi Krung Txep Maxa Nakxonga o‘zgarishini e’lon qilgan edi. Bu tay tilida “Farishtalar shahri, Buyuk poytaxt” ma’nosini beradi.
Izoh (0)