Turkiya prezidenti Rajab Toyyib Erdo‘g‘on Suriya shimolida yangi aksilterror operatsiyasi boshlanganini ma’lum qildi. Unga ko‘ra, Turkiya bilan chegaradan 30 kilometr ichkarida “xavfsizlik zonasi”ni shakllantirish boshlanmoqda.
“Biz Tall-Rifat va Manbijni (Suriya shimolidagi shaharlar — tahr.) terrorchilardan tozalayapmiz”, — dedi Erdo‘g‘on hukmron Adolat va taraqqiyot partiyasining parlamentdagi fraksiyasi yig‘ilishida.
Turkiya prezidentining qo‘shimcha qilishicha, keyinchalik Turkiya bilan chegaradosh boshqa hududlarni ham terrorchilardan tozalash rejalashtirilgan. U aksilterror operatsiyasi ishtirokchilari soni va boshqa tafsilotlarni aytmadi. Erdo‘g‘on, shuningdek, AQSH va Rossiya Turkiya uchun xavfsizlik zonasi yaratish bo‘yicha o‘z majburiyatlarini bajarmaganini iddao qildi.
O‘z navbatida, AQSH Turkiya harbiylarining Suriyadagi amaliyotiga qarshiligini bildirdi. AQSH Davlat kotibi Entoni Blinkenning aytishicha, Suriya shimolidagi har qanday yangi hujum mintaqadagi barqarorlikka putur yetkazadi.
“Suriya shimolidagi har qanday keskinlashuvga kelsak, biz bunga qarshimiz va o‘t ochishni to‘xtatishni qo‘llab-quvvatlaymiz. Biz yangi hujumchi kuchlar mintaqadagi barqarorlikka putur yetkazishi va undan o‘z maqsadlari uchun foydalanishi mumkinligidan xavotirdamiz”, — dedi Blinken NATO Bosh kotibi Yens Stoltenberg bilan qo‘shma matbuot anjumanida.
O‘tgan hafta Rajab Toyyib Erdo‘g‘on janubiy chegaralar bo‘ylab 30 kilometrlik xavfsizlik zonasini yaratish bo‘yicha ishlarni yakunlash rejasini e’lon qilgandi. Uning ta’kidlashicha, Kurdiston Ishchilar partiyasi bilan aloqalari uchun Anqara tomonidan terrorchi tashkilotlar ro‘yxatiga kiritilgan Suriya Kurdistoni xalq himoyasi bo‘linmalari “Turkiya va Suriyaning tinch aholisiga hujum qilishda davom etmoqda”. Suriya Turkiyani etnik aholini “tozalash”da aybladi. Turkiya, shuningdek, Iroq shimolidagi kurd tuzilmalariga qarshi operatsiya o‘tkazmoqda.
Izoh (0)