Farg‘onada yiliga salkam 500 nafar ishsiz fuqaroni kasb-hunarga o‘qitish imkonini beruvchi markaz ish boshladi

Farg‘ona shahrida Janubiy Koreya xalqaro hamkorlik agentligi — KOICA bilan hamkorlikda tashkil etilgan kasb-hunarga o‘qitish markazi ish boshladi, deya xabar berdi “Daryo” muxbiri.

Markazning ochilish marosimida viloyat hokimi Xayrullo Bozorov, Koreya Respublikasining mamlakatdagi favqulodda va muxtor elchisi Kim Xi Sang, Koreya xalqaro hamkorlik agentligining O‘zbekistondagi ofisi direktori Pak Sunjin, viloyat va shahar hokimligi mas’ullari, Farg‘onadagi yirik Koreya kompaniyalari rahbarlari ishtirok etgan.

Ushbu markaz loyihasini amalga oshirish uchun Koreya xalqaro hamkorlik agentligi tomonidan 9 million 320 ming dollar miqdorida investitsiya kiritilgan. Majmua zamonaviy o‘quv binosi, yotoqxona, oshxona va sport zalidan iborat.

Markazdagi barcha zamonaviy uskuna va jihozlar Janubiy Koreyadan olib kelingan. O‘quv mashg‘ulotlari ham ushbu mamlakat dastur va qo‘llanmalari asosida o‘tiladi. Markazda elektronika, axborot texnologiyalari, avtomobilsozlik, tikuvchilik va kosmetologiya ta’lim yo‘nalishlari mavjud.

Asosiy e’tibor amaliyotga qaratilgan ushbu markazda bir yilda 480 nafar ishsiz fuqaroni kasbga o‘qitish imkoniyati mavjud. O‘quvchilar 6-8 oylik kurslarda kasbiy ta’lim oladi.