Фарғона шаҳрида Жанубий Корея халқаро ҳамкорлик агентлиги — KOICA билан ҳамкорликда ташкил этилган касб-ҳунарга ўқитиш маркази иш бошлади, дея хабар берди «Дарё» мухбири.
Марказнинг очилиш маросимида вилоят ҳокими Хайрулло Бозоров, Корея Республикасининг мамлакатдаги фавқулодда ва мухтор элчиси Ким Хи Санг, Корея халқаро ҳамкорлик агентлигининг Ўзбекистондаги офиси директори Пак Сунжин, вилоят ва шаҳар ҳокимлиги масъуллари, Фарғонадаги йирик Корея компаниялари раҳбарлари иштирок этган.
Ушбу марказ лойиҳасини амалга ошириш учун Корея халқаро ҳамкорлик агентлиги томонидан 9 миллион 320 минг доллар миқдорида инвестиция киритилган. Мажмуа замонавий ўқув биноси, ётоқхона, ошхона ва спорт залидан иборат.
Марказдаги барча замонавий ускуна ва жиҳозлар Жанубий Кореядан олиб келинган. Ўқув машғулотлари ҳам ушбу мамлакат дастур ва қўлланмалари асосида ўтилади. Марказда электроника, ахборот технологиялари, автомобилсозлик, тикувчилик ва косметология таълим йўналишлари мавжуд.
Асосий эътибор амалиётга қаратилган ушбу марказда бир йилда 480 нафар ишсиз фуқарони касбга ўқитиш имконияти мавжуд. Ўқувчилар 6-8 ойлик курсларда касбий таълим олади.
Изоҳ (0)