Varshava Ukrainaga beg‘araz yonilg‘i yetkazib berishni boshqa davom ettirmaydi. Bu haqda Polsha iqlim va atrof-muhit vaziri Anna Moskva o‘z intervyusida ma’lum qildi, deb yozadi “RBK”.
“Urush boshida va neftni qayta ishlash zavodlari bombardimon qilinganidan keyin biz yonilg‘ini beg‘araz yubordik. Endi esa bu Orlen tomonidan amalga oshiriladigan tijorat asosidagi yetkazib berishlar bo‘ladi”, — dedi u. Orlen — Polshaning eng yirik neftni qayta ishlash kompaniyasi.
Vazirning so‘zlariga ko‘ra, Ukrainaning neft kompaniyalari muammolarga uchrayotgani yo‘q.
Ukrainaga yonilg‘i yetkazib berish boshlanishi haqida Anna Moskva mart boshida e’lon qilgan edi. “Biz Ukrainani xomashyo bilan ta’minlashga qaratilgan barcha loyihalarni qo‘llab-quvvatlaymiz. Polsha hukumati tomonidan qabul qilingan chora-tadbirlar sharofati bilan, yonilg‘i allaqachon Ukrainaga yetkazilmoqda”, — degan edi u.
Rossiya Mudofaa vazirligi Ukrainaning neft infratuzilmasiga, shu jumladan, harbiylarni yonilg‘i bilan ta’minlaydigan zavodlarga zarbalar berilgani haqida ko‘p bora hisobot bergan. Chunonchi, aprel boshida Odessa yaqinidagi neftni qayta ishlash zavodi yo‘q qilingan, shuningdek, uchta yonilg‘i-moylash materiallari omboriga zarbalar berilgan edi. May oyida rossiyalik harbiylar Poltava viloyati Kremenchug shahridagi neft zavodini, shu jumladan, benzin va dizel yonilg‘isi bo‘lgan rezervuarlarni yo‘q qilib tashlagan edi.
Izoh (0)