Варшава Украинага беғараз ёнилғи етказиб беришни бошқа давом эттирмайди. Бу ҳақда Польша иқлим ва атроф-муҳит вазири Анна Москва ўз интервьюсида маълум қилди, деб ёзади «РБК».
«Уруш бошида ва нефтни қайта ишлаш заводлари бомбардимон қилинганидан кейин биз ёнилғини беғараз юбордик. Энди эса бу Орлен томонидан амалга ошириладиган тижорат асосидаги етказиб беришлар бўлади», — деди у. Орлен — Польшанинг энг йирик нефтни қайта ишлаш компанияси.
Вазирнинг сўзларига кўра, Украинанинг нефть компаниялари муаммоларга учраётгани йўқ.
Украинага ёнилғи етказиб бериш бошланиши ҳақида Анна Москва март бошида эълон қилган эди. «Биз Украинани хом ашё билан таъминлашга қаратилган барча лойиҳаларни қўллаб-қувватлаймиз. Польша ҳукумати томонидан қабул қилинган чора-тадбирлар шарофати билан, ёнилғи аллақачон Украинага етказилмоқда», — деган эди у.
Россия Мудофаа вазирлиги Украинанинг нефть инфратузилмасига, шу жумладан, ҳарбийларни ёнилғи билан таъминлайдиган заводларга зарбалар берилгани ҳақида кўп бора ҳисобот берган. Чунончи, апрель бошида Одесса яқинидаги нефтни қайта ишлаш заводи йўқ қилинган, шунингдек, учта ёнилғи-мойлаш материаллари омборига зарбалар берилган эди. Май ойида россиялик ҳарбийлар Полтава вилояти Кременчуг шаҳридаги нефть заводини, шу жумладан, бензин ва дизель ёнилғиси бўлган резервуарларни йўқ қилиб ташлаган эди.
Изоҳ (0)