Turkmanistonning sobiq prezidenti, mamlakat parlamenti yuqori palatasi raisi Gurbanguli Berdimuhamedov qurilayotgan yangi shahar ko‘chalaridan biriga o‘zining sevimli oti Akxan sharafiga nom berishni taklif qildi. Bu haqda “Neytralniy Turkmenistan” hukumat gazetasi xabar berdi.
Berdimuhamedov bu taklifni 29-may kuni Axal viloyatining bo‘lajak ma’muriy markazi qurilishiga tashrif buyurganida bildirgan.
U yerda shaharning bo‘lajak meri Shamuhammet Durdiliyev ishtirokidagi yig‘ilishda mamlakat prezidenti Serdar Berdimuhamedovning shaharda Akxan haykalini o‘rnatish taklifi muhokama qilindi. O‘shanda Berdimuhamedov haykal o‘rnatiladigan ko‘chaga Akxan nomini berishni taklif qildi. Yig‘ilish ishtirokchilari bu taklifni qo‘llab-quvvatladi.
Akxan — Gurbanguli Berdimuhamedov Turkmaniston prezidenti bo‘lgan paytda shaxsan “tarbiyalagan” poygachi ot. 2018-yilda Akxan 10 metr masofani 4,19 soniyada bosib o‘tgan edi. Ushbu yutuq Ginnesning rekordlar kitobiga kiritilgan.
2021-yil 22-martda Gurbanguli Berdimuhamedovga Akxanning birinchi toychog‘i tug‘ilgani xabar qilindi. Ashxobodning 140 yilligi munosabati bilan ot bolasiga poytaxt nomi berildi.
Axal viloyatining yangi ma’muriy markazi Turkmanistonning birinchi “aqlli” shahri bo‘ladi. U Ashxoboddan 30 kilometr janubi-g‘arbda qurilmoqda. Uning qiymati 1,5 milliard dollarga baholangan. Ushbu shaharning birinchi bosqichini qurish 2022-yilning dekabrida – Turkmaniston betaraflik kunigacha yakunlanishi kerak. Shaharga qanday nom berilishi hali noma’lum.
Izoh (0)