IT Park O‘zbekistonga yashash va ishlash uchun ko‘chib kelgan IT-mutaxassisi Aleksey Sichyov haqida hikoya taqdim etdi.
29 yoshli Aleksey EPAM kompaniyasida 7 yildan beri ishlaydi. U o‘z karyerasini middle developer sifatida boshlagan.
Hozirda Java texnologiyalarini ishlab chiqish bo‘limi boshlig‘i lavozimida faoliyat yuritadi.
O‘zbekistonga kelish haqida
O‘tgan yilning sentabr oyida kompaniya rahbariyati Alekseyga EPAM Uzbekistan’ga resurslarni boshqarish tuzilmasini yaratish, o‘qitish va kadrlar bilan ta’minlashda yordam berishni taklif qilgan.
Toshkentga yanvar oyida keldim. Avval shaharni yaqindan o‘rganishga qaror qildim. Shahar sharqona muhitga yo‘g‘rilgan, lekin aksariyat jihatdan menga Minskni eslatdi, — deydi Aleksey.
O‘zbekistonda Aleksey Java bo‘limida tuzilmani yaratish, xodimlarni ishga olish, kompaniyada o‘qitish va malaka oshirish bo‘yicha maslahatlar berish, mamlakat universitetlari bilan hamkorlik qilish masalalari uchun mas’ul.
Bir necha yil ichida biror insonning professional ma’noda o‘sishiga hissa qo‘shganingni bilish juda ruhlantiradi, — deydi u
O‘zbekistonda IT-sohasi haqida
Aleksey mahalliy IT-mutaxassislarning aksariyati o‘z sohasining professionallari ekanligini, ingliz tilini yaxshi bilishi, texnologik innovatsiyalarga qiziqishi, ta’lim va kommyuniti tadbirlarida qatnashishini ta’kidladi.
O‘zbekiston haqidagi taassurotlar
Mamlakat unda ijobiy taassurot qoldirgan.
Ko‘chalar ona shahrim ko‘chalariga o‘xshaydi. Hamma Minsk yashil manzarali shahar ekanligini aytadi. Toshkent undan-da ko‘kalamzor ekan. Har safar derazadan qaraganimda manzaraga boqib, ko‘zim to‘ymaydi, — deydi Aleksey.
Aleksey O‘zbekistonliklarni ko‘ngli ochiq, do‘stona, kirishimli, tirishqoq, xushmuomala deya ta’riflaydi. U hech qachon odamlarning bir-biroviga qo‘pol munosabatda bo‘lganini ko‘rmaganini aytgan.
Shuningdek u mamlakatda bolalarga bo‘lgan alohida munosabatga e’tibor qaratgan. Uning fikricha, bu yerning xalqi bolajon, jajji bolajonlar diqqat-e’tiborda, izzatda.
Aleksey Toshkentdan tashqari Samarqandni ham ko‘rishga ulgurgan. Keyingi manzili – Buxoro va Xiva.
“Universitetdagi ko‘plab o‘rtoqlarim va kursdoshlarim Toshkentga ko‘chib o‘tishdi, biz birga mamlakat bo‘ylab sayohat qilishni rejalashtirganmiz”, - deydi u.
O‘zbek oshxonasi
Aleksey o‘zbek oshxonasini ta’riflar ekan, ikkita asosiy so‘zni aytdi: “aqlbovar qilmaydigan darajada mazali”.
Menimcha, O‘zbekistonda, qanchalik urinmang, bemaza taom topa olmaysiz. Do‘stlarimga, agar ular kelib o‘zbek taomlarini tatib ko‘rsalar, ajoyib mahalliy taomlarning ta’mini abadiy eslab qolishlarini aytdim, — dedi u.
Aleksey esda qolarli tasssurotlardan sharqona bozorlarda unga sotuvchilar “aka” deb murojaat qilishlarini, uni biror narsani kiyib, tatib ko‘rishga undashlarini, savdolashish gashtini so‘zlab berdi.
Alekseyning uch yoshli o‘g‘li ham bor. Hozirda u o‘g‘liga uyiga yaqinroq manzilda bolalar bog‘chasi qidirmoqda.
O‘g‘lim bu yerdagi bolalar bilan do‘stlashishga ulgurdi. U juda xursand. Havo issiq, bu yerda u sevgan mevalar juda ko‘p. Rafiqamga ham Toshkent yoqdi. Yozni sabrsizlik bilan kutyapman, Toshkentda yoz qanday bo‘lishini bilmoqchiman, — deydi u.
Hozirda Alekseyning o‘zbek tilini o‘rganish niyati bor. U o‘zbek tilida bir-ikki og‘iz so‘zlasha oladi va hamkasblari bilan muloqotda o‘rganganlarini qo‘llashga harakat qilmoqda.
Izoh (0)