Наманган шаҳрининг Давлатобод туманидаги 52- умумтаълим мактабида замонавий дзюдо мажмуаси фойдаланишга топширилди. Бу ҳақда «Дарё» мухбири Азизбек Абдувалиев хабар бермоқда.
Ушбу мажмуа Халқ таълими вазирлиги ва Ўзбекистон дзюдо федерацияси ўртасида тузилган меморандумга асосан қуриб битказилди.
Дзюдо мажмуаси мактабнинг бўш турган майдонида барпо этилди. 144 та татами билан жиҳозланган ушбу иншоот ювиниш, кийим алмаштириш, тренажёр хоналарини ҳам ўз ичига олган ва тўлиқ иситиш тизимига уланган. Унда бир пайтнинг ўзида 200 нафар бола дзюдо билан шуғулланиш имкониятига эга.
Ушбу мажмуа ва унинг ёнида барпо этилган сунъий қопламали футбол майдончасини қуриш учун қарийб 3 миллиард сўм сарфланди.
Мажмуанинг очилиш маросимида Халқ таълими вазири Бахтиёр Саидов, Ўзбекистон дзюдо федерацияси президенти Азиз Комилов, Ўзбекистон Миллий олимпия қўмитаси раиси ўринбосари Шерзод Тошматов, Наманган вилояти ҳокимининг ўринбосари Ғуломжон Муродхўжаев ва жамоатчилик вакиллари иштирок этди.
Маълумот учун, бугунги кунда Наманган вилоятида 1,5 мингдан ортиқ бола дзюдо билан мунтазам шуғулланиб келмоқда.
Изоҳ (0)