“O‘zgazloyiha” ustav kapitalidagi 63,4 foiz davlat ulushini 21,5 mlrd so‘mga Prime Tower Group’ga sotish bo‘yicha kelishuvga erishganini e’lon qildi.
O‘zbekiston Prezidentining 2021-yil 11-fevraldagi farmoniga muvofiq, mazkur sohadagi korxonalarni xususiylashtirishdagi jahon tajribasi hamda Aktiv faoliyatining kompleks tahlillari (due-diligence), shuningdek, xususiylashtirish bo‘yicha maslahatchi tavsiyalariga asosan 63,4 foiz davlat ulushi yaxlit tarzda raqobat tamoyillari asosida ommaviy tanlov yo‘li bilan sotildi.
Bunda “UzAssets investitsiya kompaniyasi” (UzAssets) tomonidan eng maqbul takliflarni tanlab olish asosida Grant Thornton xalqaro kompaniyasi (keyingi o‘rinlarda – konsultant) xususiylashtirish bo‘yicha konsultant sifatida jalb etilgan.
Dentons xalqaro yuridik kompaniyasi esa huquqiy taraflama ko‘maklashgan. Mazkur xususiylashtirish doirasida konsultantlarning faoliyatlari UzAssets tomonidan muvofiqlashtirilgan.
UzAssets va agentlik rasmiy saytlaridagi 2021-yil 29-dekabr kuni sotish jarayonlari boshlangani to‘g‘risidagi e’longa muvofiq, konsultant tomonidan barcha talabgorlarning sotib olish bo‘yicha arizalari qabul qilingan.
Shuningdek, konsultant tomonidan loyihalash, qurilish hamda gaz va neft mahsulotlarini tashish xizmatlarini ko‘rsatuvchi 28 ta mahalliy va xorijiy kompaniyalarga kompaniya faoliyati to‘g‘risidagi investitsiya tizerlari yuborilgan.
Mazkur aktivni sotib olish bo‘yicha konsultant tomonidan bir qator mahalliy talabgorlarning qiziqish bildirish to‘g‘risidagi arizalari qabul qilingan va raqobat muhiti ta’minlangan.
Qiziqish bildirgan talabgorlarga aktivning faoliyati bilan yaqindan tanishishlari uchun konsultant tomonidan tayyorlangan soliq, moliya, huquqiy va ekologik tahlillar (due-diligence) mavjud bo‘lgan virtual ma’lumotlar xonasi (VDR)ga kirish imkoni yaratilgan.
Taklif etilgan narx boshqa talabgorlar tomonidan taklif etilgan narx qiymatidan yuqori ekanini inobatga olib, Prime Tower Group MCHJ ommaviy tanlov g‘olibi deb topildi.
Shunga ko‘ra, Davlat aktivlarini boshqarish agentligi va mazkur talabgor o‘rtasida bitim bo‘yicha yuridik majburiy hujjatlarni rasmiylashtirish ishlari amalga oshiriladi.
Avvalroq O‘zbekistondagi eng yirik tashuvchilardan birini xususiylashtirish jarayoni boshlangani haqida xabar berilgan edi.
Izoh (0)