«Ўзгазлойиҳа»нинг 63,4 фоиз давлат улуши 21,5 млрд сўмга сотилди

«Ўзгазлойиҳа» устав капиталидаги 63,4 фоиз давлат улушини 21,5 млрд сўмга Prime Tower Group’га сотиш бўйича келишувга эришганини эълон қилди.

Ўзбекистон Президентининг 2021 йил 11 февралдаги фармонига мувофиқ, мазкур соҳадаги корхоналарни хусусийлаштиришдаги жаҳон тажрибаси ҳамда Актив фаолиятининг комплекс таҳлиллари (due-diligence), шунингдек, хусусийлаштириш бўйича маслаҳатчи тавсияларига асосан 63,4 фоиз давлат улуши яхлит тарзда рақобат тамойиллари асосида оммавий танлов йўли билан сотилди.

Бунда «UzAssets инвестиция компанияси» (UzAssets) томонидан энг мақбул таклифларни танлаб олиш асосида Grant Thornton халқаро компанияси (кейинги ўринларда – консултант) хусусийлаштириш бўйича консултант сифатида жалб этилган. 

Dentons халқаро юридик компанияси эса ҳуқуқий тарафлама кўмаклашган. Мазкур хусусийлаштириш доирасида консултантларнинг фаолиятлари UzAssets томонидан мувофиқлаштирилган.

UzAssets ва агентлик расмий сайтларидаги 2021 йил 29 декабрь куни сотиш жараёнлари бошлангани тўғрисидаги эълонга мувофиқ, консултант томонидан барча талабгорларнинг сотиб олиш бўйича аризалари қабул қилинган.

Шунингдек, консултант томонидан лойиҳалаш, қурилиш ҳамда газ ва нефть маҳсулотларини ташиш хизматларини кўрсатувчи 28 та маҳаллий ва хорижий компанияларга компания фаолияти тўғрисидаги инвестиция тизерлари юборилган.

Мазкур активни сотиб олиш бўйича консултант томонидан бир қатор маҳаллий талабгорларнинг қизиқиш билдириш тўғрисидаги аризалари қабул қилинган ва рақобат муҳити таъминланган.

Қизиқиш билдирган талабгорларга активнинг фаолияти билан яқиндан танишишлари учун консултант томонидан тайёрланган солиқ, молия, ҳуқуқий ва экологик таҳлиллар (due-diligence) мавжуд бўлган виртуал маълумотлар хонаси (ВДР)га кириш имкони яратилган.

Таклиф этилган нарх бошқа талабгорлар томонидан таклиф этилган нарх қийматидан юқори эканини инобатга олиб, Prime Tower Group МЧЖ оммавий танлов ғолиби деб топилди.

Шунга кўра, Давлат активларини бошқариш агентлиги ва мазкур талабгор ўртасида битим бўйича юридик мажбурий ҳужжатларни расмийлаштириш ишлари амалга оширилади.

Аввалроқ Ўзбекистондаги энг йирик ташувчилардан бирини хусусийлаштириш жараёни бошлангани ҳақида хабар берилган эди.