O‘zbekistonda oziq-ovqat narxlarining qimmatlashishiga jahon bozoridagi narxlar o‘sishi ta’sir qilmoqda. Bu haqda 30-may kuni AOKAda bo‘lib o‘tgan matbuot anjumanida moliya vaziri o‘rinbosari Ahadjon Haydarov aytib o‘tdi, deya xabar bermoqda “Daryo” muxbiri.
Ahadjon Haydarovning ta’kidlashicha, oziq-ovqat bozorida keskin o‘sish kuzatilsa, hukumat tegishli choralar ko‘radi.
“Oziq-ovqat narxining oshishi faqat bizda emas, butun dunyoda kuzatilyapti. O‘zbekiston qobiqqa o‘ralib qolmagan. Biz butun hamjamiyatning a’zosi bo‘lganimiz uchun ma’lum bir mahsulotlarni eksport qilamiz, boshqalarini import qilamiz. Shu nuqtayi nazardan, biz vaziyat og‘irlashayotgan bugungi paytda iloji boricha ish haqi miqdorini oshirishga harakat qildik. Ko‘pchilikda oyliklar nima uchun 12 foizga oshirilgani to‘g‘risida savol tug‘ilmoqda. O‘tgan yili ish haqi va boshqa to‘lovlar 10 foizga oshirilgandi. Endilikda esa inflyatsiya darajasi 10-11 foiz atrofida bo‘lmoqda. Shuning uchun inflyatsiya darajasidan 1–2 foiz ko‘proq oshirdik. Ertaga haqiqatan oziq-ovqat tendensiyasi shu darajada ketadigan bo‘lsa, hukumat minimal iste’mol xarajatlari (MIX) miqdorini qayta ko‘rib chiqadi. Fevral oyida MIX 440 ming so‘m edi, hozir 500 ming so‘mga chiqdi. Bu nimani berdi? Avval yilning boshida ijtimoiy nafaqa oluvchi oilalar soni 1 million 300 mingta edi. Hozir esa bu ko‘rsatkich 2 millionga yetdi. Shu oilalarda yashovchi bolalar soni 5 million nafarni tashkil etmoqda. Qoraqalpog‘istonni misol keltirsak, hozir u yerda deyarli har uchta oiladan bittasi ijtimoiy nafaqa olmoqda. Hukumat shu jumladan, Moliya vazirligi oziq-ovqat xavfsizligini ta’minlash, narxlar oshishini aholi turmush darajasiga salbiy ta’sirining oldini olish yuzasidan barcha choralarni ko‘radi”, – dedi vazirlik rasmiysi.
Avvalroq prezident Shavkat Mirziyoyev may oyida respublikadagi inflyatsiya darajasi 1 foizga oshgani, ko‘p hokimlar narx-navoga e’tibor qilmay jilovni qo‘lidan chiqarib yuborganini aytgandi. Shuningdek, Qishloq xo‘jaligi vazirligi O‘zbekistonning o‘tgan yildagi don zaxirasi avgust oyigacha yetishini ma’lum qilgandi.
Izoh (0)