Марказий банк оилавий тадбиркорликни ривожлантириш дастурлари доирасида имтиёзли кредитлар олиш, ҳоким ёрдамчилари томонидан берилаётган тавсиялар, таъминот билан боғлиқ ҳолатлар ҳолатлар ҳақида маълумот берди.
Оилавий тадбиркорликни ривожлантириш дастурлари доирасида имтиёзли кредитлар йиллик 14 фоиз ставкада берилади. Бундай кредитлар Марказий банк асосий ставкасига боғланмаган.
Умумий тартибда асосий қарз бўйича 3 ойдан 6 ойгача бўлган имтиёзли давр билан 3 йилгача муддатга ажратилади.
Дастурлар доирасида имтиёзли кредитлар:
- чорвачилик (қорамол, қўй, эчки), балиқчилик ва паррандачилик (тухум йўналиши) учун – 1 йилгача имтиёзли давр билан 3 йилгача муддатга;
- боғдорчилик, узумчилик ва лимончиликни ташкил этиш, иссиқхона, қишлоқ хўжалиги техникаси ва асбоб-ускуналарни харид қилиш учун –
- 3 йилгача имтиёзли давр билан 7 йилгача муддатга;
- «Ҳунарманд» уюшмаси аъзоларига — 3 йилгача муддатга ҳамда айланма маблағларини тўлдириш учун 18 ойгача муддатга ажратилади.
Қарордан келиб чиқиб, жорий йилда бериладиган кредитларнинг асосий қисми аввал берилган кредитларнинг қайтарилиши ҳисобига берилади.
Агар кредитлар ўз вақтида сўндирилмаса, қайтмаган қисмига мос равишда кредит ажратиш имконияти чекланади.
Қарор бўйича тадбиркорлик ташаббусига эга жисмоний шахсларга 33 млн сўмгача бўлган миқдорда кредит ҳоким ёрдамчисининг тавсияномаси билан берилади.
Бундан ташқари белгиланган тартибда давлат рўйхатидан ўтган кичик тадбиркорлик субъектларига учинчи шахс кафиллиги, суғурта полислари, кредит ҳисобига сотиб олинаётган мол-мулклар гарови ва бошқа таъминот турлари асосида 225 млн сўмгача бўлган миқдорда маблағ ажратилади.
225 млн сўмдан ортиқ миқдордаги кредитлар кредит олиш истагини билдирувчи тадбиркорлик субъектларига ҳоким ёрдамчисининг тавсияларига мувофиқ аниқ ҳисоб-китоб қилинган ҳолдаги қарори асосида берилади.
Ўзини ўзи банд қиладиган фуқароларга айрим турдаги фаолиятни амалга ошириш (касаначилик, ҳунармандчилик, иссиқхона қуриш ва шу кабилар учун зарурий хом ашё, эҳтиёт қисми ҳамда қурилиш молларини сотиб олиш) мақсадида 5 млн сўмгача миқдорда кредит маблағлари нақд пулда берилиши мумкин.
Дастурлар доирасида қуйидаги мақсадлар учун кредит ажратилмайди:
- илгари олинган кредитларни ёки ҳар қандай бошқа қарзларни қайтариш;
- алкоголь ва тамаки маҳсулотлари ишлаб чиқариш;
- савдо-воситачиликни амалга ошириш;
- умумий овқатланиш ташкилотларининг айланма маблағларини шакллантириш;
- ишлаб чиқариш (хизмат кўрсатиш) мақсадлари учун ишлатилмайдиган шахсий мулкни (мебель, уяли телефон, маиший техника ва бошқалар) сотиб олиш;
- енгил автотранспорт воситалари (ишлаб чиқариш ва хизмат кўрсатишда иштирок этувчи кичик мототранспорт воситалари бундан мустасно), жумладан, йўловчи ташувчи автомобиллар сотиб олиш;
- маъмурий харажатларни тўлаш, жумладан, хизмат автомобиллари таъминоти;
- бино ва иншоотлар сотиб олиш ва қуриш («Ҳунарманд» уюшмаси аъзолари бундан мустасно).
Изоҳ (0)