Turkiyada koronavirusga qarshi vaksina olgan ota-onalardan g‘ayrioddiy bolalar tug‘ilayotgani to‘g‘risidagi xabarlar yolg‘on va haqiqatga mos kelmaydi. Bu haqda “Stopfake.kz” nashri xabar berdi.

Foto: “Stopface.kz”

Qator Telegram kanallarda Turkiyada koronavirusga qarshi emlangan ayollar mutant bolalar tug‘ilayotgani to‘g‘risida xabarlar tarqaldi. Ta’kidlanishicha, chaqaloqlarning dumi, yungi va ko‘plab qo‘l-oyoqlari bor. Nashrning yozishicha, bu yolg‘on bo‘lib, haqiqatga mos kelmaydi.

Moderna va Pfizer/BioNTech vaksinalarini olgan onalardan mutant bolalar tug‘ilayotgani to‘g‘risida birinchi bo‘lib Turkiya Farovonlik partiyasi raisi Fotih Erbakan gapirgan. Televideniyedagi chiqishi davomida u koronavirusga qarshi mRNK-vaksinalar insonlar DNKsini o‘zgartirib yuborishini aytgan. Shuningdek, u g‘ayrioddiy bolalarning bir nechta suratlarini ham namoyish etgan.

Qayd etilishicha, e’lon qilingan suratlarning birortasi koronavirus pandemiyasi va vaksinalarga bog‘liq emas. Birinchi suratda dumi bor chaqaloq tasvirlangan — bu grafik tahrirlagichning ishi hisoblanadi. Surat 2009-yilda suratkash Saymon Stoun tomonidan qayta ishlangan.

Usti yung bilan qoplangan bolakayning surati ham vaksinaga bog‘liq emas. Unda gipertrixoz yoki “maxluq sindromi” deya ataluvchi kasallik bilan tug‘ilgan bola tasvirlangan. 2019-yilda Ispaniyada 16 nafar bolada ushbu kasallik aniqlangan. Keyinroq ularning barchasi soch to‘kilishiga qarshi vosita bo‘lgan dorini ishlatgani ma’lum bo‘lgan.

Erbakan tomonidan namoyish etilgan uchinchi suratda 2016-yili Hindistonda tug‘ilgan siam egizaklari tasvirlangan.

“Koronavirusga qarshi dori vositalar DNKni o‘zgartirib yuborishga qodirligi borasidagi nazariyalar konspirologik bo‘lib, ilmiy faktlarga zid”, — deyiladi xabarda.