Ijtimoiy tarmoqlarda yosh yigit Toshkent shahridagi Gliyer nomidagi Respublika ixtisoslashtirilgan musiqa maktabining 3-qavati derazasidan mushuk uloqtirgani aks etgan video tarqaldi. Holat yuzasidan shahar Ichki ishlar bosh boshqarmasi o‘rganish ishlari olib bordi.
Natijada huquqbuzarning shaxsi aniqlangan. U Olmazor tumanida joylashgan yuqorida qayd etilgan musiqa maktabi o‘quvchisi X.O. (17 yoshli) bo‘lib, huquqbuzarlik voyaga yetmagan shaxs tomonidan sodir etilgan. Shu sababli 28-may kuni uning otasi U.E. (46 yoshli) ta’lim muassasasiga chaqirtirilgan. Unga farzandining tarbiyasi bo‘yicha mas’ul ekani tushuntirilgan. U.E. Ma’muriy javobgarlik to‘g‘risidagi kodeksning 47-moddasiga (bolalarni tarbiyalash va ularga ta’lim berish borasidagi majburiyatlarni bajarmaslik) asosan jarimaga tortilgan.
Ota va o‘g‘il bilan hayvonlarga nisbatan shafqatsiz munosabatga yo‘l qo‘yib bo‘lmasligi, bunday huquqbuzarlik uchun ma’muriy va jinoiy javobgarlik mavjudligi tushuntirilib, profilaktik suhbat o‘tkazilgan. Voyaga yetmagan shaxs tomonidan sodir etilgan huquqbuzarlik haqidagi ma’lumotlar tuman hokimiyati huzuridagi voyaga yetmaganlar ishlari bo‘yicha bo‘limga yuborilgan.
Shuningdek, Olmazor tumani 4-sonli IIB xodimlari tomonidan ushbu videorolikni uyali telefonda suratga olgan va internetga joylashtirgan shaxs Sh.A. (16 yoshli) ekani, muqaddam shu maktabda o‘qigani aniqlangan. Voqea yuzasidan o‘smir bilan ota-onasi ishtirokida suhbat o‘tkazilgan.
Mavzuga doir:
Izoh (0)