“Uy-joy-kommunal xizmatlar haqini to‘lash bo‘yicha kompensatsiya pul to‘lovlarini amalga oshirish tartibi to‘g‘risidagi nizomni tasdiqlash haqida”gi moliya vazirining buyrug‘i muhokamaga qo‘yildi.
Loyiha O‘zbekiston prezidentining 2022-yil yanvardagi “Aholining ijtimoiy himoyaga muhtoj toifalarini moddiy qo‘llab-quvvatlash tizimini yanada takomillashtirish to‘g‘risida”gi farmoni muvofiq ishlab chiqilgan. Unga ko‘ra, o‘zgalar parvarishiga muhtoj, ijtimoiy nafaqa oluvchi yolg‘iz shaxslarga kompensatsiya to‘lovlarini joriy etish rejalashtirilmoqda.
Quyidagilar pensiyani hisoblash bazaviy miqdorining 45 foizi miqdorida oylik kompensatsiya oluvchilari hisoblanadi:
- qonunchilikka muvofiq 1941–1945-yillardagi urush oqibatida nogironligi bo‘lgan shaxslar va uning qatnashchilariga tenglashtirilgan shaxslar;
- o‘zgalar parvarishiga muhtoj yolg‘iz pensiya yoki nafaqa oluvchi shaxslar;
- Sovet Ittifoqi Qahramonlari, Sotsialistik Mehnat Qahramonlari va “Slava” ordenining uchala darajasi bilan mukofotlangan shaxslar;
- fashist konslagerlarining sobiq voyaga yetmagan mahbuslari;
- Leningrad shahri qamali davrida ishlagan shaxslar;
- ko‘rish qobiliyati bo‘yicha I guruh nogironligi bo‘lgan shaxslar;
- Chernobil halokati oqibatida jabrlangan shaxslar;
- yadro poligonlari va boshqa radiatsiya-yadro obyektlarida harbiy xizmatni o‘tagan shaxslar.
Avvalroq O‘zbekistonda ijtimoiy himoyaga muhtoj aholiga 400 ming so‘mgacha moddiy yordam ko‘rsatilishi to‘g‘risida xabar berilgandi.
Izoh (0)