Moliya vazirligi Prezident qaroriga muvofiq 4 mln 256 mingdan ortiq pensiya va nafaqa oluvchilarga 1,3 trln so‘m mablag‘ moliyalashtirilib berilganini ma’lum qildi. To‘lov qaydnomalari shakllantirilib Xalq banki va boshqa banklarga yetkazib berilgan.
Qarorga asosan Qoraqalpog‘iston Respublikasi va viloyatlarda yashovchi yuqorida qayd etilgan toifadagi fuqarolarga har biriga – 300 ming so‘mdan, Toshkent shahrida yashovchi fuqarolarga esa – 400 ming so‘mdan moddiy yordam ajratiladi.
Shuningdek, “Ijtimoiy himoya yagona reyestri” axborot tizimi orqali 4 mln 647 mingdan ziyod kam ta’minlangan sifatida moddiy yordam oluvchi oilalarga hamda kam ta’minlangan sifatida bolalar nafaqasini oluvchi oilalarning har bir 18 yoshga to‘lmagan bolasiga – 200 ming so‘mdan moddiy yordam berish uchun 929,5 mlrd so‘m mablag‘ Davlat budjeti hisobidan ajratildi.
Qarorga muvofiq, bir nechta toifa bo‘yicha bir martalik moddiy yordam olish huquqiga ega bo‘lgan shaxslarga yordam har bir toifa bo‘yicha to‘lab beriladi.
Joriy yilning 29-may holatiga ko‘ra plastik kartalari orqali pensiya va nafaqa oluvchi fuqarolarning 100 foiz yoki (4,9 mln fuqaroga) 1,1 trln so‘mlik mablag‘lar bank plastik kartalariga yuklab berilgan.
Shuningdek, Xalq bankining joylardagi filiallari orqali naqd pul shaklida to‘lovlar sayyor kassalar orqali 28 foizga yoki (1,1 mln fuqaroga) 303,4 mlrd so‘mlik mablag‘lar fuqarolariga yetkazildi. Mazkur to‘lovlar joriy yil 8-iyunga qadar yakunlanadi.
Avvalroq O‘zbekistonda ijtimoiy himoyaga muhtoj aholiga 400 ming so‘mgacha moddiy yordam ko‘rsatilgani haqida xabar berilgan edi.
Izoh (0)