Ижтимоий тармоқларда ёш йигит Тошкент шаҳридаги Глиер номидаги Республика ихтисослаштирилган мусиқа мактабининг 3-қавати деразасидан мушук улоқтиргани акс этган видео тарқалди. Ҳолат юзасидан шаҳар Ички ишлар бош бошқармаси ўрганиш ишлари олиб борди.
Натижада ҳуқуқбузарнинг шахси аниқланган. У Олмазор туманида жойлашган юқорида қайд этилган мусиқа мактаби ўқувчиси Х.О. (17 ёшли) бўлиб, ҳуқуқбузарлик вояга етмаган шахс томонидан содир этилган. Шу сабабли 28 май куни унинг отаси У.Э. (46 ёшли) таълим муассасасига чақиртирилган. Унга фарзандининг тарбияси бўйича масъул экани тушунтирилган. У.Э. Маъмурий жавобгарлик тўғрисидаги кодекснинг 47-моддасига (болаларни тарбиялаш ва уларга таълим бериш борасидаги мажбуриятларни бажармаслик) асосан жаримага тортилган.
Ота ва ўғил билан ҳайвонларга нисбатан шафқатсиз муносабатга йўл қўйиб бўлмаслиги, бундай ҳуқуқбузарлик учун маъмурий ва жиноий жавобгарлик мавжудлиги тушунтирилиб, профилактик суҳбат ўтказилган. Вояга етмаган шахс томонидан содир этилган ҳуқуқбузарлик ҳақидаги маълумотлар туман ҳокимияти ҳузуридаги вояга етмаганлар ишлари бўйича бўлимга юборилган.
Шунингдек, Олмазор тумани 4-сонли ИИБ ходимлари томонидан ушбу видеороликни уяли телефонда суратга олган ва интернетга жойлаштирган шахс Ш.А. (16 ёшли) экани, муқаддам шу мактабда ўқигани аниқланган. Воқеа юзасидан ўсмир билан ота-онаси иштирокида суҳбат ўтказилган.
Изоҳ (0)