O‘zbek sharhlovchilik maktabi asoschisi, taniqli sport sharhlovchisi Axbor Imomxo‘jayev 86 yoshda vafot etdi
Axbor Imomxo‘jayev 30-may kuni vafot etgan. Bu haqda PFL direktori, marhumning nabirasi Diyor Imomxo‘jayev ma’lum qildi. Qayd etilishicha, janoza 31-may, seshanba kuni soat 10:00 da o‘qiladi.
Axbor Imomxo‘jayev 1936-yil 19-fevral kuni Toshkentda tavallud topgan. U zamonaviy o‘zbek sport jurnalistikasining asoschilaridan biridir. Futbol sohasida ko‘plab kitoblar muallifi. Faoliyati davomida futbol uchrashuvlarida hakamlik qilib, respublika toifasidagi hakam darajasigacha yetib borgan. 10 yil davomida O‘zbekistonning eng yaxshi hakamlari qatorida bo‘lgan. “Paxtakor” futbol klubida jamoa boshlig‘i lavozimida ishlagan. O‘zbekiston televideniyesida sport tahririyati sharhlovchisi, bo‘lim mudiri va bosh muharrir lavozimlarida faoliyat ko‘rsatgan.
Uning qalamiga mansub “Futbol – quvonchim, dardim, faxrim”, “Maftuningman, futbol” va “O‘zbegimning Mirjaloli”, o‘zbek futbolining 100-yilligiga bag‘ishlab “Asr futbolidagi asl qadrdonlarim” kabi kitoblari futbol muxlislarida katta qiziqish bilan kutib olingan. Axbor Imomxo‘jayev o‘zbek sporti rivojiga qo‘shgan hissasi uchun “Shuhrat” medali, “O‘zbekiston Respublikasida xizmat ko‘rsatgan yoshlar murabbiyi” faxriy unvoni bilan taqdirlangan. Shuningdek, Turon fanlar akademiyasining akademigi va O‘zbekiston jurnalistlarining “Oltin qalam” milliy mukofoti sovrindori bo‘lgan.
Izoh (0)