Ўзбек шарҳловчилик мактаби асосчиси, таниқли спорт шарҳловчиси Ахбор Имомхўжаев 86 ёшда вафот этди
Ахбор Имомхўжаев 30 май куни вафот этган. Бу ҳақда ПФЛ директори, марҳумнинг набираси Диёр Имомхўжаев маълум қилди. Қайд этилишича, жаноза 31 май, сешанба куни соат 10:00 да ўқилади.
Ахбор Имомхўжаев 1936 йил 19 февраль куни Тошкентда таваллуд топган. У замонавий ўзбек спорт журналистикасининг асосчиларидан биридир. Футбол соҳасида кўплаб китоблар муаллифи. Фаолияти давомида футбол учрашувларида ҳакамлик қилиб, республика тоифасидаги ҳакам даражасигача етиб борган. 10 йил давомида Ўзбекистоннинг энг яхши ҳакамлари қаторида бўлган. «Пахтакор» футбол клубида жамоа бошлиғи лавозимида ишлаган. Ўзбекистон телевидениесида спорт таҳририяти шарҳловчиси, бўлим мудири ва бош муҳаррир лавозимларида фаолият кўрсатган.
Унинг қаламига мансуб «Футбол – қувончим, дардим, фахрим», «Мафтунингман, футбол» ва «Ўзбегимнинг Миржалоли», ўзбек футболининг 100 йиллигига бағишлаб «Аср футболидаги асл қадрдонларим» каби китоблари футбол мухлисларида катта қизиқиш билан кутиб олинган. Ахбор Имомхўжаев ўзбек спорти ривожига қўшган ҳиссаси учун «Шуҳрат» медали, «Ўзбекистон Республикасида хизмат кўрсатган ёшлар мураббийи» фахрий унвони билан тақдирланган. Шунингдек, Турон фанлар академиясининг академиги ва Ўзбекистон журналистларининг «Олтин қалам» миллий мукофоти совриндори бўлган.
Изоҳ (0)