Isroil aviatsiya ma’murlari parvoz uchun berilgan ruxsatnomaga qaramay, Belarusning Belavia aviakompaniyasi samolyotlariga xizmat ko‘rsatishdan bosh tortdi. Natijada, aviakompaniya Tel-Avivga yozgi mavsum uchun barcha reyslarni 27-oktabrgacha bekor qildi. Bu haqda kompaniya matbuot xizmati xabar berdi.
Belavia oldindan sotib olingan chiptalarning pulni qaytarishga tayyorligini ma’lum qildi. Matbuot xizmati uchish uchun ruxsatnoma nima sababdan olib qo‘yilganiga aniqlik kiritmagan.
“Berilgan ruxsatnoma asosida aviakompaniya yangi reyslar uchun chiptalar sotishni boshlagan edi, birinchi reys 2-iyunga belgilangandi. Isroil tomonining avvalgi kelishuvlarni bekor qilish haqidagi kutilmagan qarori ajablanarli”, — deya Belavia bosh direktorining so‘zlarini keltiradi matbuot xizmati.
Belavia 15-may kuni Isroil aviatsiya ma’muriyatidan Tel-Avivga uchish uchun ruxsat olgandi. Dastlabki reys 2-iyun kuni amalga oshirilishi kerak edi.
2021-yilning yozida Yevropa davlatlari Belavia aviakompaniyasiga o‘z havo hududidan foydalanishni taqiqlagan edi, chunki o‘tgan yozda Ryanair aviakompaniyasining reysi mina haqidagi yolg‘on xabar tufayli Minskka majburiy qo‘ndirilgandi. Samolyot qo‘ngandan so‘ng Nexta Telegram kanalining sobiq bosh muharriri Roman Protasevich va uning sobiq sevgilisi Sofya Sapega qo‘lga olindi. 2021-yilning dekabr oyida Belavia aviakompaniyasiga Yevropa Ittifoqida samolyotlarni ijaraga olish taqiqlandi, oqibatda uning floti 15 tagacha samolyotga qisqardi.
Izoh (0)