Исроил авиация маъмурлари парвоз учун берилган рухсатномага қарамай, Беларуснинг Belavia авиакомпанияси самолётларига хизмат кўрсатишдан бош тортди. Натижада, авиакомпания Тель-Авивга ёзги мавсум учун барча рейсларни 27 октябргача бекор қилди. Бу ҳақда компания матбуот хизмати хабар берди.
Belavia олдиндан сотиб олинган чипталарнинг пулни қайтаришга тайёрлигини маълум қилди. Матбуот хизмати учиш учун рухсатнома нима сабабдан олиб қўйилганига аниқлик киритмаган.
«Берилган рухсатнома асосида авиакомпания янги рейслар учун чипталар сотишни бошлаган эди, биринчи рейс 2 июнга белгиланганди. Исроил томонининг аввалги келишувларни бекор қилиш ҳақидаги кутилмаган қарори ажабланарли», — дея Belavia бош директорининг сўзларини келтиради матбуот хизмати.
Belavia 15 май куни Исроил авиация маъмуриятидан Тель-Авивга учиш учун рухсат олганди. Дастлабки рейс 2 июнь куни амалга оширилиши керак эди.
2021 йилнинг ёзида Европа давлатлари Belavia авиакомпаниясига ўз ҳаво ҳудудидан фойдаланишни тақиқлаган эди, чунки ўтган ёзда Ryanair авиакомпаниясининг рейси мина ҳақидаги ёлғон хабар туфайли Минскка мажбурий қўндирилганди. Самолёт қўнгандан сўнг Nexta Telegram каналининг собиқ бош муҳаррири Роман Протасевич ва унинг собиқ севгилиси Софя Сапега қўлга олинди. 2021 йилнинг декабрь ойида Belavia авиакомпаниясига Европа Иттифоқида самолётларни ижарага олиш тақиқланди, оқибатда унинг флоти 15 тагача самолётга қисқарди.
Изоҳ (0)