Ukrainaning sobiq prezidenti Pyotr Poroshenko 30-may kuni Ukrainadan Polshaga jo‘nab ketdi. Bungacha, 28-may kuni u ikki marta davlat chegarasini kesib o‘tishga uringan, biroq siyosatchini mamlakatdan tashqariga chiqarishmagan edi.
30-may kuni Poroshenko Facebook’da Ukrainaning amaldagi prezidenti Vladimir Zelenskiyga ochiq xat e’lon qildi. Sobiq prezident, xususan, Rotterdamga Yevropa xalq partiyasi qurultoyi va sammitiga rasmiy taklif bilan ketayotganini qayd etdi.
Poroshenkoning so‘zlariga ko‘ra, safardan quyidagi maqsadlar ko‘zlangan — iyun oyida Ukrainaga Yevropa Ittifoqi a’zoligiga nomzod maqomini berish, Ukrainani Rossiyaga qarshi urushda qo‘llab-quvvatlash va yangi sanksiyalarga erishish, shuningdek, moliyaviy yordam, jumladan, urushdan keyin mamlakatni qayta tiklash. Ukrainaning sobiq prezidenti urush davrida donolik va ichki birlikni namoyon etish nihoyatda muhim ekanini ta’kidlagan.
Murojaat e’lon qilinganidan ko‘p o‘tmay, Ukraina OAVlari, jumladan, “Gromadske” va “Ukrainskaya pravda” nashrlari Poroshenko chegarani kesib o‘tgani haqida xabar berdi.
Poroshenko NATO Parlament Assambleyasi yig‘ilishiga borish uchun Ukrainani tark etishga dastlab ikki marta urindi. Uning ketishga ruxsati bor edi, biroq ukrainalik chegarachilar birinchi safar QR kodni o‘qiy olmadi, keyin esa Ukraina sobiq prezidentida zarur hujjatlar yetarli emasligini aytishdi.
Ukraina huquq-tartibot idoralari Poroshenkoni 2014—2015-yillarda Donetsk va Lugansk xalq respublikalaridan ko‘mir keltirish bo‘yicha ish doirasida davlatga xiyonat, terrorchi tashkilotlarga yordam berish va terrorizmni moliyalashtirishda ayblamoqda. Poroshenko pasportini topshirish sharti bilan Kiyev sudi siyosatchini shaxsiy majburiyatlari yuzasidan ozod qilish to‘g‘risida qarorni qabul qilgan.
Izoh (0)