Yangi qonunda ijtimoiy himoyaga muhtoj insonlar auksionda yer sotib olsa, uning xarajatlari davlat tomonidan qoplanishi belgilanmoqda. Bu haqda 28-may kuni bo‘lib o‘tgan Senatning 26-yalpi majlisida Adliya vaziri Ruslanbek Davletov ma’lum qildi, deya xabar bermoqda “Daryo” muxbiri.
Senatda “Yer munosabatlarida tenglik va shaffoflikni ta’minlash, yerga bo‘lgan huquqlarni ishonchli himoya qilish va ularni bozor aktiviga aylantirish tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun muhokama qilindi. Hujjatda nogironligi bo‘lgan shaxslar onlayn auksionda yer uchastkalarini sotib olsa, uning xarajatlari Vazirlar Mahkamasi tomonidan qoplab berilishi belgilangani yuzasidan berilgan savolga Adliya vaziri Ruslanbek Davletov javob qaytardi.
Bugungi kungacha nogironligi bo‘lgan shaxslarga yer ajratish to‘g‘risidagi qaror mahalliy darajada ishlab kelgan. Ya’ni katta byurokratiya va qiyinchiliklardan o‘tib, nogironligi bo‘lgan shaxslarga yerlar ajratilishi kam yuz bergan. Yer islohoti bo‘lib, yer ajratish hokimliklar zimmasidan olingach, bu jarayon to‘xtab qoldi. Fuqarolar kelib: “Mana qonunda norma turibdi, bizning huquqimiz bor – yer olishimiz kerak”, deydi. Ko‘p holatlarda hokim qarori uchun hamma hujjatlar tayyorlanib, 2-3 yil oradan o‘tib, oxirida hokimga imzo uchun kirganda ham to‘xtab qolgan holatlar bo‘ldi. Chunki farmon chiqqandan keyin hokimliklardan ro‘yxatdan o‘tkazadigan jurnallar ham olib qo‘yildi. Shuning uchun bu imtiyoz to‘g‘ri qo‘llanilmadi. Qabul qilingan mazkur qonunga kiritdikki, endi yer tekinga berilmaydi. U faqat sotiladi. Bu qonunda agar davlat qaysidir ijtimoiy ehtiyoji bor bo‘lgan qatlamga yordam bermoqchi bo‘lsa, pulini bersin, sotib olib bersin, auksionda ishtirok etgan pulini kompensatsiya qilib bersin, degan g‘oya majassam.Nogironligi bor shaxslar bizda adashmasam, 2-3 million nafardan ko‘p bo‘lsa kerak. Shuning uchun mana shu qatlamning ichidagi alohida ehtiyoj va yashash sharoitlarini e’tiborga olib, biz obyektiv va shaffof bo‘ladigan yangi nizomni Vazirlar Mahkamasi darajasida tayyorlaymiz. Lekin oldindan aytish kerak, har bir nogironligi bo‘lgan shaxs kelib: “Mana shu maqomimga ko‘ra, yer yoki yerga kompensatsiya berishing kerakL, deya olmaydi. Chunki buning imkoni bo‘lmaydi. Alohida o‘ylab, buni kerak bo‘lsa Senatga ham kiritib, ochiq tizim qilamiz.
Ruslanbek Davletov, adliya vaziri.
Majlisda Senatning Agrar va suv masallari qo‘mitasi raisi Bahodir Tojiyev nuqt so‘zlab, qonunda ko‘zda tutilgan yangiliklarni aytdi.
Endilikda mazkur hujjat bilan qishloq xo‘jaligiga qarashli yerlar faqatgina ijara huquqi asosida ajratiladi. Ijara berish Vazirlar Mahkamasi tomonidan ochiq elektron tanlov va auksion vositasida amalga oshirilishi Yer kodeksida qat’iy belgilab qo‘yilmoqda. Jumladan, qonunda jismoniy va yuridik shaxslarga qishloq xo‘jaligiga mo‘ljallangan yer uchastkalari ochiq elektron tanlov va ijara huquqi asosida berilishi belgilanmoqda.Ma’lum qilinishicha, qonunda fuqarolar yig‘inining yer uchastkalarini berish masalalarini ko‘rib chiqish, tuman, shahar komissiyasiga o‘z vakilini yuborish vakolatlari bekor qilinmoqda. Yer kodeksiga kiritilayotgan o‘zgartirishga ko‘ra, Kadastr agentligi organlari yer uchastkalaridan maqsadsiz foydalanilayotganini aniqlagan taqdirda ushbu yer uchastkalariga bo‘lgan huquqni bekor qilish yuzasidan to‘g‘ridan to‘g‘ri sudga murojaat qilish vakolatiga ega bo‘ladi. Majlisda senatorlar mazkur qonunni ma’qulladi.Qonun bilan kiritilayotgan muhim yangiliklardan biri, oldingi tartibdan farqli o‘laroq, endilikda viloyat hokimlari ochiq elektron tanlov yakunlarini tasdiqlashi talab etilmayda. Ya’ni Yer kodeksidan hokimlarning qishloq xo‘jaligiga mo‘ljallangan yerlarni ijaraga berish bo‘yicha ochiq elektron tanlov yakunlarini tasdiqlashiga doir norma chiqarib tashlanmoqda.
Bahodir Tojiyev, senator
Izoh (0)