Янги қонунда ижтимоий ҳимояга муҳтож инсонлар аукционда ер сотиб олса, унинг харажатлари давлат томонидан қопланиши белгиланмоқда. Бу ҳақда 28 май куни бўлиб ўтган Сенатнинг 26-ялпи мажлисида Адлия вазири Русланбек Давлетов маълум қилди, дея хабар бермоқда «Дарё» мухбири.
Сенатда «Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун муҳокама қилинди. Ҳужжатда ногиронлиги бўлган шахслар онлайн аукционда ер участкаларини сотиб олса, унинг харажатлари Вазирлар Маҳкамаси томонидан қоплаб берилиши белгилангани юзасидан берилган саволга Адлия вазири Русланбек Давлетов жавоб қайтарди.
Бугунги кунгача ногиронлиги бўлган шахсларга ер ажратиш тўғрисидаги қарор маҳаллий даражада ишлаб келган. Яъни катта бюрократия ва қийинчиликлардан ўтиб, ногиронлиги бўлган шахсларга ерлар ажратилиши кам юз берган. Ер ислоҳоти бўлиб, ер ажратиш ҳокимликлар зиммасидан олингач, бу жараён тўхтаб қолди. Фуқаролар келиб: «Мана қонунда норма турибди, бизнинг ҳуқуқимиз бор – ер олишимиз керак», дейди. Кўп ҳолатларда ҳоким қарори учун ҳамма ҳужжатлар тайёрланиб, 2-3 йил орадан ўтиб, охирида ҳокимга имзо учун кирганда ҳам тўхтаб қолган ҳолатлар бўлди. Чунки фармон чиққандан кейин ҳокимликлардан рўйхатдан ўтказадиган журналлар ҳам олиб қўйилди. Шунинг учун бу имтиёз тўғри қўлланилмади. Қабул қилинган мазкур қонунга киритдикки, энди ер текинга берилмайди. У фақат сотилади. Бу қонунда агар давлат қайсидир ижтимоий эҳтиёжи бор бўлган қатламга ёрдам бермоқчи бўлса, пулини берсин, сотиб олиб берсин, аукционда иштирок этган пулини компенсация қилиб берсин, деган ғоя мажассам.Ногиронлиги бор шахслар бизда адашмасам, 2-3 миллион нафардан кўп бўлса керак. Шунинг учун мана шу қатламнинг ичидаги алоҳида эҳтиёж ва яшаш шароитларини эътиборга олиб, биз объектив ва шаффоф бўладиган янги низомни Вазирлар Маҳкамаси даражасида тайёрлаймиз. Лекин олдиндан айтиш керак, ҳар бир ногиронлиги бўлган шахс келиб: «Мана шу мақомимга кўра, ер ёки ерга компенсация беришинг керакЛ, дея олмайди. Чунки бунинг имкони бўлмайди. Алоҳида ўйлаб, буни керак бўлса Сенатга ҳам киритиб, очиқ тизим қиламиз.
Русланбек Давлетов, адлия вазири.
Мажлисда Сенатнинг Аграр ва сув масаллари қўмитаси раиси Баҳодир Тожиев нуқт сўзлаб, қонунда кўзда тутилган янгиликларни айтди.
Эндиликда мазкур ҳужжат билан қишлоқ хўжалигига қарашли ерлар фақатгина ижара ҳуқуқи асосида ажратилади. Ижара бериш Вазирлар Маҳкамаси томонидан очиқ электрон танлов ва аукцион воситасида амалга оширилиши Ер кодексида қатъий белгилаб қўйилмоқда. Жумладан, қонунда жисмоний ва юридик шахсларга қишлоқ хўжалигига мўлжалланган ер участкалари очиқ электрон танлов ва ижара ҳуқуқи асосида берилиши белгиланмоқда.Маълум қилинишича, қонунда фуқаролар йиғинининг ер участкаларини бериш масалаларини кўриб чиқиш, туман, шаҳар комиссиясига ўз вакилини юбориш ваколатлари бекор қилинмоқда. Ер кодексига киритилаётган ўзгартиришга кўра, Кадастр агентлиги органлари ер участкаларидан мақсадсиз фойдаланилаётганини аниқлаган тақдирда ушбу ер участкаларига бўлган ҳуқуқни бекор қилиш юзасидан тўғридан-тўғри судга мурожаат қилиш ваколатига эга бўлади. Мажлисда сенаторлар мазкур қонунни маъқуллади.Қонун билан киритилаётган муҳим янгиликлардан бири, олдинги тартибдан фарқли ўлароқ, эндиликда вилоят ҳокимлари очиқ электрон танлов якунларини тасдиқлаши талаб этилмайда. Яъни Ер кодексидан ҳокимларнинг қишлоқ хўжалигига мўлжалланган ерларни ижарага бериш бўйича очиқ электрон танлов якунларини тасдиқлашига доир норма чиқариб ташланмоқда.
Баҳодир Тожиев, сенатор
Изоҳ (0)