Turkmaniston parlamenti prezident Serdar Berdimuhamedovning onasi Ogulgerek Berdimuhamedovaga “Turkmanistonda xizmat ko‘rsatgan gilamdo‘z” faxriy unvonini berdi. Bu haqda Turkmenportal xabar qildi.
Ushbu unvon davlat buyurtmasiga binoan Berdimuhamedovaga “Turkmaniston mustaqilligi va suverenitetini mustahkamlash, milliy gilamdo‘zlik san’atini rivojlantirish, gilamlarni ajoyib naqshlar bilan bezash hamda ko‘p yillik mashaqqatli va vijdonli mehnati, kasb mahorati” bilan “Turkmenkovyor” davlat uyushmasiga qo‘shgan hissasi uchun berilgan.
Farmonda Berdimuhamedova “Turkman gilamdo‘zlik san’atini rivojlantirish, takomillashtirish, kelajak avlodlarga yetkazish, mohir qo‘llar bilan yaratilgan gilam naqshlari orqali muqaddas Vatanning shonli ravnaqini butun dunyoga tarannum etishda munosib hissa qo‘shgan mohir gilamdo‘zlardan biri” sifatida e’tirof etilgan.
Shuningdek, yana o‘n bir nafar gilamdo‘zga shunday faxriy unvon berish to‘g‘risidagi prezident farmoni e’lon qilingan.
“Turkmanistonda xizmat ko‘rsatgan gilamdo‘z” faxriy unvoni 1991-yildan beri may oyining so‘nggi yakshanbasida nishonlanib kelinayotgan turkman gilami bayrami arafasida beriladi.
Mavzuga doir: Turkmanistonda milliy bayram munosabati bilan 210 kvadrat metrli ulkan gilam yaratilmoqda
Izoh (0)