Тошкентда сотиб олинган телефоннинг собиқ эгасига тегишли интим расмлар билан уни шантаж қилиб, пул ундирмоқчи бўлган икки йигит қўлга олинди. Бу ҳақда пойтахт ИИББ ахборот хизмати хабар берди.
Маълум қилинишича, 20 ёшли Б. ўзининг iPhone 11 Pro смартфонини сотиш учун интернетга эълон берган. Шундан сўнг, телефонга харидорлар харидорлар чиққан. Улар телефонни харид қилишга рози бўлган ва учрашиб олинган. Телефонни топшириш вақтида фуқаро Б. пулни олиб, ундаги маълумотларни ўчириш учун телефонни қайтариб беришни сўраганида, 23 ҳамда 21 ёшли бўлган икки харидор ундаги маълумотларни ўзлари ўчириб ташлашларини айтган.
Орадан бир кун ўтиб, B. исмли харидор Б.га қўнғироқ қилган ва телефонда интим суратларни топиб олгани билдириб, 1,5 минг доллар бермаса, уни интернетда шарманда қилишини маълум қилган.
Жабрланувчи бунча пули йўқлиги, фақатгина 700 доллари борлигини айтганида, улар бунга рози бўлган.
Шундан сўнг фуқаро Б. ИИОга мурожаат қилган ва харидорлар Б.дан пулни олаётган вақтида ушланган. Ҳолат бўйича йигитларга нисбатан Жиноят кодексининг 165-моддаси (товламачилик) билан жиноят иши қўзғатилган.
Мазкур моддада кўрсатилган қилмиш учун қонун уч йилдан беш йилгача озодликдан маҳрум қилиш тарзидаги жазони назарда тутади.
Бундан олдин Наманганда тадбиркорларни «шантаж» қилиб, улардан пул олиб келган аёл ушлангани, Тошкентда қизнинг кийимсиз ҳолдаги видеосини тарқатмаслик учун ундан 5 минг доллар талаб қилган шахсга ҳукм ўқилгани, Хоразмда Instagram’даги обрўсизлантирувчи расмларни ўчириш эвазига 5 минг доллар сўраган шахс ушлангани тўғрисида хабар берилганди.
Изоҳ (0)