Xorazm viloyatida Instagram ijtimoiy tarmog‘i sahifasidagi rasmlarni o‘chirish evaziga pul talab qilgan shaxs qo‘lga olindi, deb xabar beradi Bosh prokuratura huzuridagi departament.
Foto: Bosh prokuratura huzuridagi departament
Ma’lum qilinishicha, departamentning Xorazm viloyat boshqarmasi tomonidan fuqarolarning qonuniy huquq va manfaatlarini himoya qilish yuzasidan tezkor tadbir o‘tkazilgan. Tadbir davomida M.B. ismli shaxs fuqaro S.ning nomiga ochilgan Instagram ijtimoiy tarmog‘i sahifasidagi uni obro‘sizlantiruvchi rasmlarni o‘chirish evaziga pul so‘ragani aniqlangan. U tovlamachilik yo‘li bilan fuqarodan akasi orqali 5 ming dollarni talab qilib olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 165-moddasi (tovlamachilik) bilan jinoyat ishi qo‘zg‘atilib, tergovga tegishliligi bo‘yicha yuborilgan.
Avvalroq Toshkentda ishqiy munosabatda bo‘lgan “sevgan qizi”dan pul undirib kelgan yigitga jinoyat ishi qo‘zg‘atilgani, Andijonda ikki yigit tanishining telefonini tortib olib, undagi intim videolarni tarqatmaslik uchun 10 ming dollar talab qilgani, Namanganda Telegram’dagi yozishmalarini tarqatish bilan qo‘rqitib, 17 yoshli qizdan 200 dollar talab qilgan yigit ushlangani to‘g‘risida xabar berilgandi.
