Jizzax viloyati Paxtakor tumani Paxtakor qishlog‘idagi to‘yxonada noqonuniy tungi klub faoliyatiga chek qo‘yildi. Bu haqda viloyat Ichki ishlar boshqarmasi xabar qildi.
Qayd etilishicha, bundan avval ijtimoiy tarmoqlarda “Tojmahal” to‘yxonasining ikkinchi qavatida bir necha kungina faoliyat yuritgan tungi klubning videosi tarqalgan. Videolavhada ochiq kiyingan ayollarning jazavali raqsi aks etgan. IIB xodimlari esa holat bo‘yicha tekshiruv ishlari olib borgan.
Tekshiruv davomida klub jamoasining ayrim a’zolari va mast mijozlar mayda bezorilik sodir etib, xodimlarning qonuniy talablarini bajarmagan. Holat yuzasidan 11 ta ma’muriy huquqbuzarlik holati aniqlanib, bayonnoma rasmiylashtirilgan.
Aniqlanishicha, ushbu tungi klub faoliyati uchun qonuniy asoslar mavjud emas. Klub tashkilotchisi va to‘yxona egasi o‘rtasida tuzilgan ijara shartnomasi ham noqonuniy bo‘lgan.
Klubda Toshkent shahrining Sergeli va Mirzo Ulug‘bek tumanlarida yashovchi 2002, 2003-yillarda tug‘ilgan qizlar raqqosalik qilgan.
“Musiqa bo‘lgan payt o‘ynagandik, lekin bunaqa bo‘lib ketadi deb o‘ylamagandik”. “O‘yinchilik qilgani emas, aylanishga kelgandik. Bizni shunaqa qiz deb o‘ylashdi. Qora shim, oq ko‘ylakda o‘ynaganmiz, bu ochiq kiyim emas”, — deydi qizlar.
Norasmiy tungi klub egasi va unda qo‘riqchi bo‘lib ishlaydigan shaxs raqqosalarning gapi noto‘g‘ri ekanini aytgan.
“Qizlarni ikki marta alishtirdik. Avvalgilari ochiq-sochiq kiyingani uchun boshqa uch nafar qiz olib keldik“, — degan ulardan biri.
Tungi klub boshlig‘ining aytishicha, klub faoliyatini qonuniylashtirish bo‘yicha hujjatlar tayyorlanayotgan bo‘lgan. Hali jarayon yakunlanmasidan reyd tadbirlarida aniqlangan.
Tungi klubda IIB xodimlari talabiga bo‘ysunmagan mast yigitlardan biriga sud hukmi o‘qildi. U besh kun muddatga ozodlikdan mahrum qilingan.
“Tez orada voqeaga aloqador boshqa qonunbuzarlarga ham sud tegishli jazoni tayinlaydi”, — deyiladi xabarda.
Izoh (0)