Adliya vaziriga yangi o‘rinbosar tayinlandi, deb xabar bermoqda Telegram’dagi “Nigoh” kanali.
Qayd etilishicha, ushbu lavozimga To‘lqin Abdusattorov tayinlangan. U shu munosabat bilan Intellektual mulk agentligi direktori lavozimidan ozod etilgan. Abdusattorov agentlik rahbari lavozimiga 2019-yilning sentabr oyida prezident qaroriga muvofiq tayinlangandi.
To‘lqin Abdusattorov 1978-yilda Jizzax viloyatida tug‘ilgan, ma’lumoti oliy, 1999-yilda Samarqand davlat universitetini, 2003-yilda Jahon iqtisodiyoti va diplomatiya universitetini, 2007-yilda O‘zbekiston milliy universitetini tamomlagan, mutaxassisligi huquqshunos.
To‘lqin Abdusattorov mehnat faoliyatini 2003-yilda Fanlar akademiyasi falsafa va huquq instituti kichik ilmiy xodimi lavozimidan boshlagan.
2019-yil mart oyidan Oliy Majlisi Qonunchilik palatasi Korrupsiyaga qarshi kurashish va sud-huquq masalalari qo‘mitasining raisi lavozimida faoliyat yuritgan.
Avvalroq O‘zbekiston Adliya vazirligi tizimida yangi lavozim tayinlovlari amalga oshirilgani, adliya vaziriga yangi o‘rinbosar tayinlangani, O‘zbekiston texnik jihatdan tartibga solish agentligiga direktor tayinlangani haqida xabar kelib tushgan.
Izoh (0)