Жиззах вилояти Бахмал туманида эр-хотин жанжали сабаб бир фуқаро ҳалок бўлди. Бу ҳақда Ички ишлар вазирлиги хабар қилди.
Қайд этилишича, туманнинг «Гулбулоқ» маҳалласида яшовчи эркак турмуш ўртоғи билан рашк сабаб жанжаллашган. Бундан хабар топган эр-хотиннинг қариндошлари келишмовчиликка аралашган. Юз берган муштлашувда эркакнинг отасига теша билан оғир тан жароҳати етказилган.
Оқибатда жабрланувчи қишлоқ врачлик пунктида кўрсатилган тиббий ёрдамга қарамай, вафот этган.
Суд тиббий экспертизаси марҳумнинг ўлимига бош мия ёпиқ жароҳати, бош мия ва бош мия пардалари остига, шунингдек, миячага қон қуйилиши, бош мия тўқимасининг эзилиши ва сиқилиши натижасида бош миядаги ҳаёт учун муҳим бўлган марказларнинг фалажланиши сабаб бўлганини қайд этган.
Қотилликни содир этган шахсга нисбатан Жиноят кодексининг 104-моддаси 3-қисми «д» банди (жабрланувчининг ўлишига сабаб бўлган қасддан баданга оғир шикаст етказиш) билан жиноят иши қўзғатилган. Унга қамоқ эҳтиёт чораси қўлланилган. Ҳозирда тергов ҳаракатлари олиб борилмоқда.
Аввалроқ Самарқандда йигит фолбин ва унинг қизини ўлдиргани, Самарқандда руҳий носоғлом йигит отасини 15 марта пичоқ уриб ўлдиргани, Андижонда 78 ёшли аёл уйидан ўлик ҳолда топилгани ҳақида хабар берилган.
Изоҳ (0)